ရွှေဖရုံသီး အစာသွပ်ပေါင်း

 

ဗီယက်နမ်စျေးက ဝယ်လာတဲ့ ရွှေဖရုံသီး သေးသေးလေးတွေကို ဒီနေ့တော့ ကြက်သားစင်းကောနဲ့ အရသာနယ်ကာ အစာသွပ်ပြီး ပေါင်းဖြစ်တာနဲ့ မာမာပြင်ဆင်တဲ့ နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ

ရွှေဖရုံသီး - ခပ်သေးသေး နှစ်လုံး (တစ်လုံးကို 600 g ခန့် )

ကြက်သား - 150 g

ကြက်သွန်ဖြူ - အမွှာကြီးကြီး ၃မွှာ

ကြက်သွန်နီ - အနေတော် တလုံး

ချင်းတက် - လက်တဆစ်ခန့်

ကြက်သွန်မိတ် - အပင်ကြီးကြီး ၃ပင်

မုံလာဥနီ - အနေတော် တစ်ဥ

ကြက်ဥ -၂လုံး

ဆား - လက်ဖက်ရည်ဇွန်း တစ်ဇွန်း

အရသာမှုန့် - လက်ဖက်ရည်ဇွန်း တစ်ဝက်သာသာ

နှမ်းဆီမွှေး - လက်ဖက်ရည်ဇွန်း သုံးပုံတစ်ပုံ

ပြင်ဆင်ပုံ

ရွှေဖရုံသီးကို အလုံးလိုက် ရေဆေးပြီး ပုံပါအတိုင်း ထိပ်ဖက်မှ လှီးဖြတ်ပေးပါ

ပြီးတာနဲ့ အသီးအထဲမှ အစေ့နှင့် အူတိုင်များကို ဇွန်းနှင့်ကော်ထုတ်ပေးပါ

ပြီးတာနဲ့ အထဲဘက်ကို ရေဆေးပေးပါ

ကြက်သားကို နုတ်နုတ်စင်းထားပါ

ကြက်သွန်နီကို အခွံခွာပြီး အလုံးလိုက် ရေဆေးကာ ခပ်နုတ်နုတ် လှီးထားပါ

ကြက်သွန်ဖြူကို အခွံခွာပြီး ရေဆေးကာ ခပ်နုနုတ် စင်းထားပေးပါ

ချင်းကိုအခွံခွာပြီး ရေဆေးကာ ညက်နေအောင် ထောင်းထားပါ

အားလုံးအဆင်သင့့် ဖြစ်တာနဲ့ ပန်းကန်တစ်ခုထဲမှာ ပါ၀င်ပစ္စည်းများကို ထည့်ပေးပြီး အရသာ သမအောင် နယ်ပေးပါ

အရသာ သမသွားတာနဲ့ ရွှေဖရုံသီးထဲကို ဇွန်းနှင့်ခပ်ပြီး ထည့်ပေးပါ

ပြီးတာနဲ့ ရွှေဖရုံသီးကို အညှာဖက် အပိုင်းလေးတင်ပြီး အုပ်ပေးပါ

အသီးရဲ့ အောက်ဖက်မှာ ကြွေပန်းကန်လုံး တခုခံပြီး တင်ပေးပါ

ပေါင်းအိုးရဲ့ အောက်ခံအိုးထဲမှာ ပေါင်းမည့်ပန်းကန်လုံး တစ်ဝက်လောက် မြုပ်အောင်ထည့်ပြီး ပေါင်းမည့်ပန်းကန်လုံးကို ထည့်ပေးပါ

ရွှေဖရုံသီး ပန်းကန်လုံးကို ထည့်ပေးပြီတားနဲ့ အိုးအဖုံးအုပ်ကာ ပေါင်းပေးပါ

Pressure cooker နဲ့ ပေါင်းတာဖြစ်တဲ့အတွက် pressure cooker လုတ်ကိုနှိပ်ပြီး မိနစ်နှစ်ဆယ် ပေါင်းပေးပါ

ပေါင်းချိန်ပြည့်တာနဲ့ ပေါင်းအိုးမှ လေကိုကုန်အောင် ထုတ်ပေးပြီးမှ ပေါင်းအိုးအဖုံးကို ဖွင့်ပေးပါ

ပေါင်းအိုးထဲမှ ပေါင်းခံပန်းကန်လုံးကို အပူမလောင်အောင် လက်အိတ်နှင့် အပြင်ကို ထုတ်ပေးပါ

အပြင်ရောက်တာနဲ့ အရသာ အင်မတန် ရှိလွန်းတဲ့ ရွှဖရုံသီးပေါင်းလေး ရပါပြီ

ရွှေဖရုံသီး အစာသွတ်ပေါင်းကို မိမိနှစ်သက်သလို လှီးပေးကာ ပူပူလူလူလေး စားသုံးရန် ပြင်ပေးနိူင်ပါပြီ။