ဒီနေ့တော့ ငါးခူလေးတွေ ဝယ်လာပြီး ဆန်လှော်ထောင်းနဲ့ရောကာ စားလို့ကောင်းအောင် ငရုတ်ဆုံထဲထည့်ပြီး အချက် ၂၀၀၀လောက် စိတ်ရှည်လက်ရှည်နဲ့ ထောင်းထားပါတယ်။
ဗလင်ဒါထဲ ထည့်ပြီးကြိတ်မယ် ဆိုရင်တော့ တစ်မိနစ်ကြိတ် တစ်ခါနားပြီး ၁၀ခါလောက် ကြိတ်ပေးရင် ရပါတယ် ဒါကြောင့်မို့လို့ စားလို့ကောင်းလွန်းတဲ့ ငါးဆုတ်လေး ရမှာဖြစ်တဲ့အတွက် မာမာပြင်ဆင်ပြီး ကြော်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- ငါးခူ - 500 g
- ချင်း - လက်တဆစ်ခန့်
- ကြက်သွန်ဖြူ - အမွှာကြီးကြီး လေးမွှာ
- ဆား - လက်ဖက်ရည်ဇွန်း တစ်ဝက်
- အရသာမှုန့် - လက်ဖက်ရည်ဇွန်း တစ်ဇွန်း
- ဆန်လှော်မှုန့် - ထမင်းစားဇွန်း သုံးဇွန်း
- နနွင်းမှုန့် - လက်ဖက်ရည်ဇွန်း တစ်ဝက် (ငါးဖယ်ခြစ်ထဲထည့်ရန်)
- နနွင်းမှုန့် - လက်ဖက်ရည်ဇွန်း လေးပုံတစ်ပုံ (ဆီအိုးထဲထည့်ရန် )
- ဆီ - လိုသလောက် သုံးပေးပါ
- မန်ကျည်းသီးမှည့် - အနည်းငယ် ( ငါးဆေးရန်)
- ဆား - ထမင်းစားဇွန်း တစ်ဇွန်း (ငါးဆေးရန်)
ပြင်ဆင်ပုံ
- ငါးခူကို မလိုတာတွေ ဖယ်ပေးပြီး ဆားနှင့်မကျည်းသီးမှည့်တို့ထည့်ကာ သေသေချာချာ နယ်ပေးကာ ရေစင်အောင် ဆေးပေးပါ
- ပြီးတာနဲ့ စဉ့်နီတုန်းပေါ်တင်က ညက်နေအောင် စင်းပေးပါ
- ကြက်သွန်ဖြူကို အခွံခွာပြီး ရေဆေးထားပါ
- ချင်းကိုအခွံခွာပြီး ရေဆေးထားပါ
- ငရုတ်ဆုံကြီးကြီးထဲမှာ စင်းထားသောငါးခူ ကြက်သွန်ဖြူ ချင်း ဆား ဟင်းချိုမှုန့် နနွင်းမှုန့်တို့ထည့်ပေးပြီး စိတ်ရှည်လက်ရှည် ထောင်းပေးပါ
- ငရုတ်ဆုံထဲမှာ ထည့်မထောင်းပါက အားလုံကိုရောပြီး ဗလင်ဒါထဲမှာ တစ်မိနစ်ကြိတ်လိုက် တစ်ခါနားလိုက် ၁၀ခါလောက်ထည့်ပြီး ကြိတ်ပေးပါ
ငါးဆုတ်ကြော်ရန်
- ကြိတ်ပြီးသား ( သို့ ) ထောင်းပြီးသား ငါးခူစင်းကောကို အရင်ဆုံး လက်ကိုဆီစွတ်ပြီး ကိုယ်နှစ်သက်တဲ့ ပုံစံလေးများ ရအောင် ငါးအသားများ ကုန်တဲ့အထိ တစ်လုံးခြင်း ဆုတ်ထားပေးပါ
- ဒယ်အိုးတစ်လုံးကို အပူပေးပြီး အိုးပူလာမွ ဆီနှင့် နနွင်းမှုန့်ကိုထည့်ပြီး မီးကိုအနည်းငယ် လျှော့ပေးပါ
- ငါးဆုတ်လုံး မကိုင်ခင် လက်ကိုဆီစွတ်ပြီး ဆုတ်ထားသော ငါးဆုတ်ကို ငါးချက်လောက် ထပ်ပြီးဆုတ်ပြီးမှ ဆီအိုးထဲကို တစ်လုံးချင်းထည့်ပြီး ကြော်ပေးပါ
- ကြော်နေစဉ် အကျက်ညီစေရန် ငါးဆုတ်လုံးကို အထက်အောက် လှန်လှန်ပေးပါ
- ငါးဆုတ်လုံး တစ်ခုလုံး ရွှေဝါရောင်သန်းပါက ဆယ်ပြီး ဆီစစ်ပေးပါ
- ဆီစစ်သွားတာနဲ့ စားလို့ကောင်းပြီး မွှေးကြိုင်နေတဲ့ ငါးခူ ငဆုတ်လေးတွေ ရပါပြီ။
No comments:
Post a Comment