ပုဇွန်ထုတ် ငါးပိရည်ဖျော်

 

 

ဒီနေ့တော့ ငါးပိရည်ကို အဖျော်ခပ်ပျစ်ပျစ်လေးနဲ့ စားချင်တဲ့အတွက် ငါးပိရည်ကျိုပြီး ငါးပိရည်ဖျော်လေး ပြင်ဆင်ဖြစ်လို့ ပုဇွန်ထုတ်တွေကို မီးကင်ကာ ဖျော်ထားတဲ့ ငါးပိရည်ဖျော် ဖျော်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ

1. ငါးရံ့ငပိရည်ကျိုရန် ငါးပိအနှစ် - ထမင်းစားဇွန်း မောက်မောက် လေးဇွန်း
2. ဆား - လက်ဖက်ရည်ဇွန်း တစ်ဇွန်းခွဲ
3. နနွင်းမှုန့် - လက်ဖက်ရည်ဇွန်း တစ်၀က်မရှိတစ်ရှိ
4. ရေ - လက်ဖက်ရည် အကြမ်းပန်းကန် သုံးလုံး ခွဲသာသာ
5. ပုဇွန်ထုတ် - ခြောက်ထုတ်
6. ကြက်သွန်နီ - ခပ်သေးသေး ငါးလုံး
7. ကြက်သွန်ဖြူ - အမွှာကြီးကြီး ဆယ်မွှာ
8. ငရုတ်သီးစိမ်း - မိမိနှစ်သက်သလောက်ထည့်ပါ
9. အချိုမှုန့် - လက်ဖက်ရည်ဇွန်း တစ်ဝက်
10. ငရုတ်သီး အလှော်မှုန့် - ထမင်းစားဇွန်း နှစ်ဇွန်း

ငါးပိရည်ကျိုရန် ပြင်ဆင်ပုံ

1. ငါးပိအနှစ် ဆား နနွင်းမှုန့်နှင့် ရေတို့ကို အိုးတစ်လုံးထဲ ထည့်ပေးပြီး ငါးမိနစ်လောက် ပွက်ပွက်ဆူအောင် တည်ပေးပါ
2. ငါးပိရည် ရလာပါက အရိုးများကို စစ်ပေးပြီး ပန်းကန်တစ်လုံးထဲကို ငါးပိရည်များ ပြောင်းထည့်ထားပါ။

ပြင်ဆင်ပုံ

• ကြက်သွန်ဖြူနှင့် ကြက်သွန်နီတို့ကို အိုးအသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ  ထည့်လှော်ပေးပါ
• ပုဇွန်ထုတ်ကိုလဲ ရေဆေးကာ ပုဇွန်ထုတ်ကို မီးသွေးမီးဖိုရှိက အခွံများ ကျွမ်းအောင်ဖုတ်ပေးပါ သို့မဟုတ်
• အသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ  ထည့်လှော်ပေးပါ
• ပြီးတာနဲ့ ပုဇွန်အခွံများခွာကာ ခေါင်းများဖြုတ်ထားပေးပါ
• ငရုတ်သီးစိမ်းကိုလဲ ရေဆေးကာ အသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ  ထည့်လှော်ပေးပါ
• အားလုံးအဆင်သင့်ဖြစ်တာနဲ့ ငရုတ်သီးစိမ်းနှင့် ကြက်သွန်ဖြူနှင့် ကြက်သွန်နီတို့ကို ငရုတ်ဆုံထဲမှာထည့်ပြီး မညက်တစ်ညက် အနေအထားရအောင် ထောင်းပေးပါ
• အားလုံးအဆင်သင့် ဖြစ်ပါက ငါးပိရည် ပန်းကန်ထဲမှာ ပုဇွန်ထုတ်များ အချိုမှုန့် ငရုတ်သီး အလှော်မှုန့်နှင့် ထောင်းထားတာတွေ ထည့်ကာ ရောဖျော်ပေးပါ
• အဖျော်မွှေးမွှေးလေးနဲ့ အရသာရှိလှတဲ့ ငါးပိရည်ဖျော်လေးကို တို့စရာအစုံနှင့် မြိန်ယှက်စွာ စားသုံးနိုင်ပါပြီ။