Sunday 8 October 2017

ကြက်သားခရုဆီ အစိမ်းကြာ်


တစ်ခါတစ်ခါ ဟင်းချက်ရတာ ပျင်းတဲ့နေ့တွေဆို အခုလို အမြန်ဟင်းလေးတွေ ချက်ဖြစ်ပါတယ် ထမင်းပူပူ ဟင်းပူပူလေးဆို တခြားဟင်းတွေ မလိုတော့ဘဲ စားမြိန်ဟင်းလေးတော့ ဖြစ်လာခဲ့ပါတယ်။

ဒီတခါတော့ ကြက်သားကို အပြားလေးတွေလှီးပြီး ဂျုံမှုန့်နှင့် ကပ်ပြီးကြော်ကာ ခရုဆီနဲ့ ဂေါ်ဖီတို့နဲ့ရောပြီး အစိမ်းကြော်လေး ကြော်ဖြစ်လို့ ကြော်နည်းလေး မျှဝေလိုက်ပါတယ်။

ပါဝင်ပစ္စည်းများ

  1. ခပ်ပြားပြား အတုံးလေးတွေ တုံးထားသော ကြက်ရင်ပုံသား - 150 g
  2. ဂျုံမှုန့် - ထမင်းပေါင်းအိုး ဆန်ချင်ဗူး တစ်ဗူးစာ
  3. အဖတ်လေးတွေရအောင် လှီးထားသော ကြက်သွန်နီ - အနေတော် တစ်ဥ
  4. ဓါးပြားရိုက်ထားသော ကြက်သွန်ဖြူ - အမွှာကြီးကြီး သုံးမွှာ
  5. ငရုတ်သီးအကြမ်းဖတ် - အနည်းငယ်
  6. အနေတော် လှီးထားသော ဂေါ်ဖီ - သုံးရွက်ခန့်
  7. အနေတော် လှီးထားသော ပန်းဂေါ်ဖီ - ငါးခက်ခန့်
  8. အရှည်လိုက် လှီးထားထေားသောချင်း - လက်တစ်ဆစ်ခန့်
  9. ဆား - လက်ဖက်ရည်ဇွန်း တစ်ဝက်
  10. ငံပြာရည် - ထမင်းစားဇွန်း တစ်ဝက်ခန့်
  11. ပဲငံပြာရည်အနောက် - ထမင်းစားဇွန်း တစ်ဇွန်း
  12. ခရုဆီ - ထမင်းစားဇွန်း တစ်ဇွန်း
  13. ဆီ - လိုသလောက် သုံးပါ (ကြက်သားကြော်ရန်)
  14. ဆီ - ထမင်းစားဇွန်း လေးဇွန်း (ဟင်းချက်ရန် )
  15. နှမ်းဆီ - ၄စက်ခန့်

ပြင်ဆင်ပုံ

  • ပထမဆုံး လှီးထားသော ကြက်သားကို ဂျုံမှုန့်ထဲမှာ လူးပေးထားပါ
  • ပြီးတာနဲ့ ဆီကိုအပူပေးပါ 
  • ဆီပူတာနဲ့ ကြက်သားကို ထဲ့ကြော်ပေးပါ
  • ကြက်သားကို ၃မိနစ်လောက်ကြော်ပြီးတာနဲ့ ဆယ်ပြီးဆီစစ်ပေးပါ
  • ပိုနေသောဆီများကို အနည်းငယ် ချန်ထားပြီးတာနဲ့ကြက်သွန်ဖြူ ကြက်သွန်နီ ချင်းတို့ကို တမိနစ်လောက် ထဲ့မွှေပေးပါ
  • ပြီးတာနဲ့ ကြက်သားကြော် ပန်းဂေါ်ဖီ  ငရုတ်သီး အကြမ်းဖတ်နှင့် ဂေါ်ဖီတို့ကိုထဲည့်ကာ တမိနစ်လောက် ထဲ့ကြော်ပါ
  • ပြီးတာနဲ့ ဆား ငံပြာရည် ခရုဆီ  ပဲငံပြာရည်တို့ကို တစ်ခါထဲ ဆက်တိုက် ထဲ့ပြီးမွှေပေးပါ
  • ကြက်သွန်များ နွမ်းမသွားအောင် မြန်မြန်ကြော်ပြီး နှမ်းဆီထည့်မွှေကာ မီးပိတ်ပေး၍ အရသာမြည်းပြီး လိုသလို ပြင်ပေးကာ ပန်းကန်ထဲ ပြောင်းထဲ့ပေးပါ
  • ထမင်းပူပူလေးနှင့် အရသာရှိစွာ သုံးဆောင်နိုင်သော ကြက်သား ခရုဆီကြော် ရပါပြီ။

No comments:

Post a Comment