ဒီနေ့တော့ ခရမ်းကြွတ်သီးလေးတွေ ဝယ်လာပြီး ပုဇွန်ထုတ်လေးတွေနဲ့ တောချက် ဆီလည်ရေလည်ချက်လေး ချက်ပါတယ်။
ငါးပိရည် ခပ်စပ်စပ်လေးနဲ့ နယ်ဖတ်ပြီး စားလို့ရအောင် ဆီကျန်ရေကျန်လေး ချက်ထားတာမို့လို့ မာမာပြင်ဆင်ပြီး ချက်ထားတဲ့ လွယ်ကူမြန်ဆန် ချက်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ခရမ်းကြွတ်သီး - အလုံးနှစ်ဆယ်ခန့်
- ကြက်သွန်နီ ဥကြီးကြီး - တစ်ဥ
- ပုဇွန် - ဆယ်ကောင်ခန့်
- ကြက်သွန်ဖြူ - အမွှာကြီးကြီး ၃မွှာ
- ဆား - လက်ဖက်ရည်ဇွန်း တစ်၀က်သာသာ
- အရသာမှုန့် - လက်ဖက်ရည်ဇွန်း တစ်၀က်
- ငရုတ်သီးအရောင်တင်မှုန့် - လက်ဖက်ရည်ဇွန်း တစ်ဇွန်းမောက်မောက်
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆီ - ထမင်းစားဇွန်း ၅ဇွန်း
ပြင်ဆင်ပုံ
- ခရမ်းသီးကို အညှာ ပြတ်အောင်လှီးပြီး ထက်ဝက်ခြမ်းပေးကာ ရေနာရီ၀က်လောက် စိမ်ထားပါ
- အညိုရောင် အရည်များ ထွက်သွားပါက ရေစင်အောင်ဆေးပြီး ရေစစ်ထားပေးပါ
- ကြက်သွန်ဖြူ ကြက်သွန်နီနှင့့်တို့ကို အခွံခွာပြီး ရေစင်အောင် ဆေးပေးကာ ငရုတ်သီး အရောင်တင်မှုန့်နှင့် ရောပြီးထောင်းပေးပါ
- ပုဇွန်ကို ရေစင်အောင်ဆေးပြီး အခွံခွာပြီး အစာအိတ်နှင့် အစာလမ်းကြောင်းကို ဖယ်ပေးပါ
- ဇောက်နက်သော အိုးတစ်လုံးထဲမှာခရမ်းသီး နနွင်းမှုန့် ဆား ဆီ အရသာမှုန့်နှင့် ပုဇွန်တို့ကို ရောနယ်ပေးထားပါ
- အိုးထဲမှာ အရသာ နယ်ထားသော ခရမ်းသီးကို ရေအနည်းငယ်ထည့်ကာ အဖုံးအုပ်ပြီး တည်ပေးပါ
- အိုးမကပ်စေရန် မမွှေဘဲ လှုပ်ပေးပြီး လုံးရည်ခမ်းကာနီးတာနဲ့ ရေလိုသလောက် ထပ်ထည့်ပေးပြီး ပွက်ပွက်ဆူအောင် တည်ပေးပါ
- အိုးထဲမှာ ဆီကျန်ရေကျန် အနေအထားလေးရအောင် တည်ပေးပါ
- ခရမ်းသီးနူးပါက အရသာမြည်းပြီး မိမိစိတ်ကြိုက် အရသာရအောင် ပြင်ပေးပါ
- အရသာ လိုသလို ပြင်ပေးပြီးတာနဲ့ ပုဇွန်ခရမ်းသီးတောချက် စပ်စပ်လေးကို သုံးဆောင်နိုင်ပါပြီ။
No comments:
Post a Comment