ဒီနေ့တော့ ကြက်သားကော်ပြန်လိပ်ကြော်လေး ကြော်ပါမယ် ၀က်သားအစား ကြက်သားနဲ့ကြော်တာပါ ၀က်သားဆိုရင် မာမာတို့အိမ်မှာ လူမညီပါဘူး မစားတဲ့သူက များတဲ့အတွက် ကြက်သားနဲ့ဘဲကြော်တာပါ။
စိတ်၀င်စားလို့ကြော်စားကြည့်မယ် ဆိုရင်တော့ ကော်ပြန့်ရွက် ၇ရွက်အတွက် လိုအပ်တာလေးတွေ ပြောပါမယ်။
ပါ၀င်ပစ္စည်းများ
ကြိတ်စက်ဖြင့် ညက်နေအောင် ကြိတ်ထားသော ကြက်ရင်ပုံသား - 200 g
ကော်ပြန့်ရွက် - ၇ရွက်
အနေတော် လှီးထားသော တရုတ်နံနံ - တရုတ်ဟင်းပြင်ပန်းကန်အသေး တစ်လုံးစာ
အနေတော် လှီးထားသော ကြက်သွန်မိတ်ပင် - တရုတ်ဟင်းပြင်ပန်းကန် တစ်လုံးစာ
ခပ်နုတ်နုတ် လှီးထားသော ကြက်သွန်နီ - တရုတ်ဟင်းပြင်ပန်းကန် တစ်လုံးစာ
ဆား - လက်ဖက်ရည်ဇွန်း တစ်၀က်သာသာ
အရသာမှုန့် - လက်ဖက်ရည်ဇွန်း တစ်ဇွန်း
ပဲငံပြာရည် - ထမင်းစားဇွန်း တစ်ဇွန်း
Cornflour - ထမင်းစားဇွန်း တစ်ဇွန်းခွဲ ( ကြက်သားမှာနယ်ထားပေးပါ )
ငရုတ်ကောင်းမှုန့် - လက်ဖက်ရည်ဇွန်း တစ်၀က်မရှိတစ်ရှိ
ဆီ - လိုသလောက် သုံးပေးပါ
အစာကြော်ပြီး လိပ်ရန်နှင့် ဂျုံအရည်ဖျော်ရန်
ဆီကို မီးအပူပေးပြီး ကြက်သွန်နီကို အရင်ကြော်ပါ
နွမ်းလာပါက ကြက်သားကိုထဲ့ပြီး ဆား အရသာမှုန့် ပဲငံပြာရည် ငရုတ်ကောင်းမှုန့်တို့ထဲ့ပြီး ၆မိနစ်လောက်ကြော်ပေးပါ
အသားအရောင်ပြောင်းလာပြီး မာလာတာနဲ့ ကြက်သွန်မိတ် တရုတ်နံနံတို့ထဲ့ပြီး၂မိနစ်လောက် မွှေပေးပါ ကျက်သွားရင် အအေးခံထားပါ
ကော်ပြန့်ရွက်လိပ်ပြီး ထိပ်စကိုကပ်ရန် ဂျုံထမင်းစားဇွန်း တစ်ဇွန်းသာသာကို ရေထမင်းစားဇွန်း ၂ဇွန်းနဲ့ ဖျော်ထားပါ
ကော်ပြန့်ရွက်ကိုထောင့်ချွန်းခင်းပြီး ထောင့်ချွန်းအပေါ်မှာ အစာကိုထမင်းစားဇွန်း ၂ဇွန်းကျောကျော်ထဲ့ပါ
ထောင့်ချွန်းဖက်မှ စပြီးလိပ်ပေးပြီး ဘေး၂ဖက်ကိုခေါက်ပြီး ဆက်လိပ်ပေးပါ
အလိပ်ဆုံးကာနီးမှာ ဖျော်ထားသော ဂျုံအရည်စွတ်ပြီး လိပ်လိုက်ပါ
၇လိပ်လုံးလိပ်ပေးပါ
ကော်ပြန့်လိပ်၇လိပ်စာအတွက် အပြင်အကာခွံအနှစ်စပ်ရန်
ကြက်ဥကြီးကြီး - တစ်လုံး
အကြော်မှုန့်- ထမင်းစားဇွန်း ၅ဇွန်း
ရေ. - ထမင်းစားဇွန်း ၂ဇွန်းတို့နဲ့ အားလုံးကျေအောင်ဖျော်ထားပါ
ကြော်ရန်
ဆီကိုအပူပေးပြီး ဆီပူလာပါက မီးကိုအလယ် အလတ်လောက် လျော့ပြီးမှ ကြက်သားလိပ်ကို ဖျော်ထားသော အပြင်အကာခွံအတွက် စပ်ထားသော အနှစ်ထဲမှာလူးပြီး ဆီအိုးထဲသို့ တစ်လိပ်ခြင်းနှစ်ပေးပြီး ထဲ့ကြော်ပေးပါ
မီးအရမ်း မပြင်းအောင် သတိထားပြီး ကြော်ပေးပါ
တစ်ဖက်ကျက်ရင် တစ်ဖက်ကို လှန်ပေးပြီး၂ဖက်လုံး ရွှေဝါရောင်သန်းပြီး ကြွတ်ရွလာလျှင် ဆယ်ပြီးဆီစစ်ထားပေးပါ။
အချဉ်ရည်စပ်ရန်
Chili sauce ထမင်းစားဇွန်း နှစ်ဇွန်း
ငရုတ်သီးအလှော်မှုန့် ထမင်းစားဇွန်း တစ်ဇွန်း
သကြား ထမင်းစားဇွန်း တစ်ဇွန်း
ငံပြာရည် ထမင်းစားဇွန်း နှစ်ဇွန်း
အနေတော်လှီးထားသော နံနံပင် အပင်ကြီးကြီး သုံးပင်
မညက်တညက်ထောင်းထားသော ကြက်သွန်ဖြူ အမွှာကြီးကြီး ၇မွှာ
ရေ ထမင်းစားဇွန်း ၅ဇွန်း အားလုံးရောပြီး ဖျော်ပေးပါ။
