အသားတု အုန်းနို့ကြာဇံကြီး

 

ဒီနေ့တော့ ဝါတွင်းကာလ သတ်သတ်လွတ် အုန်းနို့ဟင်းရည်လေးချက်ပြီး ကြာဇံကြီးဖတ်လေးတွေပြုပ်ကာ ကြာဇံကြီးကို အုန်းနို့ဟင်းရည်လေးနဲ့ တွဲဖက်ပြီး စားကြဖို့ ပြင်ဆင်ပါမယ်။

ဟင်းရည်ချက်နည်းကတော့ အုန့်နို့ခေါက်ဆွဲ ဟင်းရည်ချက်နည်းနဲ့ အတူတူပါဘဲ မုန့်ဖတ်သုံးတာဘဲ ကွာသွားပါတယ် ဒါကြောင့်မို့လို့ မာမာပြင်ဆင်ပြီး ချက်ထားတဲ့ သတ်သတ်လွတ် အသားတု အုန်းနို့ဟင်းရည် ချက်နည်လေးးကို မျှဝေပေးလိုက်ပါတယ်ရှင်။

အုန်းဆီချက်ရန် ပါဝင်ပစ္စည်းများ

1. အုန်းနို့ - 400 ml (cream ဗူးကိုသုံးပေးပါ)
2. ဆား - လက်ဖက်ရည်ဇွန်း တစ်ဝက်
3. ဆီ - မုန့်လုပ်ရာတွင် ချင်တွယ်သောခွက် တစ်ခွက်

အုန်းဆီချက်ပုံ

• အိုးတစ်လုံးထဲမှာ အုန်းနို့ဗူးကို ဖောက်ထည့်ပေးပါ
• ပြီးတာနဲ့ ဆားထည့်ပြီး မီးဖိုပေါ် တင်ပေးပါ
• အိုးနို့အိုး တည်ထားစဉ် ဝေကျတတ်တဲ့အတွက် မကြာမကြာ မွှေပေးပါ
• အုန်းနို့အိုးထဲမှ အုန်းနို့များ အတော်လေး ခမ်းလာတာနဲ့ ဆီထည့်ပြီး မွှေပေးပါ
• အုန်းနို့များ တဖြေးဖြေး ဥလာတာနဲ့ မီးပိတ်ပြီး မီးဖိုပေါ်က ဖယ်ထားပါ

ဟင်းရည်ချက်ရန် ပါဝင်ပစ္စည်းများ

1. အသားတု - 100 g
2. နနွင်းမှုန့် - လက်ဖက်ရည်ဇွန်း သုံးပုံတစ်ပုံ
3. ဆား - လက်ဖက်ရည်ဇွန်း တစ်ဝက်
4. အရသာမှုန့် - လက်ဖက်ရည်ဇွန်း တစ်ဇွန်း
5. ရေ - အသားတု မြုပ်အောင် ထည့်ပေးပါ

အသားတု အရသာနယ်ရန်

• ဇလုံတစ်လုံးထဲမှာ အသားတုများ မြုပ်အောင် ရေထည့်ပြီး တစ်နာရီလောက် စိမ်ထားပါ
• ရေစိမ်ထားသော အသားတုများ ပျော့လာတာနဲ့ ရေညှစ်ကာ ရေစစ်ထားပါ
• ပြီးတာနဲ့ ဆား နနွင်းမှုန့် နှင့် အရသာမှုန့် တို့ထည့်ပေးကာ ခပ်နာနာ  နယ်ပေးပါ

အသားတု ဆီသတ်ရန် ပါဝင်ပစ္စည်းများ

1. အရသာ နယ်ထားသော အသားတုများ
2. ကြက်သွန်ဖြူ - အမွှာကြီးကြီး သုံးမွှာ (ဟင်းချက်ရန် ခပ်နုတ်နုတ် စင်းထားပါ)
3. ကြက်သွန်နီ - အနေတော် နှစ်လုံး (ဟင်းချက်ရန် ခပ်နုတ်နုတ် လှီးထားပါ)
4. ငရုတ်သီး အရောင်တင်မှုန့် - လက်ဖက်ရည်ဇွန်း နှစ်ဇွန်း (အသားတု ဆီသတ်ရန်)
5. နနွင်းမှုန့် - လက်ဖက်ည်ဇွန်း တစ်ဝက်
6. ဆား - လက်ဖက်ရည်ဇွန်း တစ်ဇွန်းခွဲ
7. ဆီ - ထမင်းစားဇွန်း လေးဇွန်း
8. အရသာမှုန့် - လက်ဖက်ရည်ဇွန်း တစ်ဇွန်း
9. အုန်းဆီချက်ပြီးသား - ထမင်းစားဇွန်း ငါးဇွန်း

အသားတု ဆီသတ်ရန်

• အသားတု ဆီသတ်ရန် ပါဝင်ပစ္စည်းများကို ပြင်ထားပေးပါ
• ကြက်သွန်နီကို အခွံခွာပြီး အလုံးလိုက် ရေဆေးကာ ခပ်နုတ်နုတ်လေးတွေ လှီးထားပေးပါ
• ကြက်သွန်ဖြူကို အခွံခွာပြီး ရေဆေးကာ ခပ်နုတ်နုတ် စင်းထားပေးပါ
• ဒယ်အိုးထဲမှာ ဆီထည့်ပြီး နနွင်းမှုန့် လက်ဖက်ရည်ဇွန်း တစ်ဝက်ထည့်ပြီး အပူပေးပါ
• ဆီပူလာတာနဲ့ ကြက်သွန်နီ ကြက်သွန်ဖြူနှင့် ငရုတ်သီး အရောင်တင်မှုန့်တို့ထည့်ပြီး ဆီသတ်ပေးပါ
• ဆီသတ်နံ့ မွှေးလာတာနဲ့ အရသာ နယ်ထားသော အသားတုကို ထည့်မွှေပေးပါ
• အသားတုများ ထည့်ပြီးတာနဲ့  ဆား အရသာမှုန့် အုန်းဆီချက် ထည့်ပြီးပေးကာ ဆက်ပြီးဆီသတ်ပေးပါ
• အရသာ သမလောက်တာနဲ့ ရေမြုပ်အောင်ထည့်ပြီး ရေခမ်းပြီး ဆီပြန်တဲ့အထိ တည်ပေးပါ
• ဆီသတ်ပြီး ချက်ထားသော အသားတုများ ဆီပြန်လာတာနဲ့ မီးပိတ်ပေးထားပါ။

ကြာဇံကြီးဖတ်ပြုပ်ရန် ပါဝင်ပစ္စည်းများ

1. နန်းကြီးဖတ် - 400 g တစ်ထုတ်
2. ဆား - လက်ဖက်ရည်ဇွန်း တစ်ဝက်
3. ဆီ - ထမင်းစားဇွန်း တစ်ဇွန်း

ကြာဇံကြီးဖတ်ပြုပ်ပုံ

• ဇောက်နက်သော အနေတော် အိုးတစ်လုံးထဲမှာ ရေတစ်ဝက်သာသာထည့်ပြီး ပွက်ပွက်ဆူအောင် တည်ပေးပါ
• ရေပွက်ပွက်ဆူလာတာနဲ့ ဆားနှင့်ဆီတို့ကိုထည့်ပေးပါ
• ပြီးတာနဲ့ ကြာဇံကြီးဖတ် အခြောက်ထုတ်ကို ဖောက်ပြီး ထည့်ပေးပါ
• ပြုပ်နေစဉ် ကြာဇံကြီးဖတ်များ ပွလာပါပြီး ရေလိုပါက ရေနွေးပူပူကို ထပ်ထပ်ပြီး ထည့်ပေးပါ
• မုန့်ဖတ်ပြုပ်ချိန် အနည်းငယ် ကြာနိုင်တဲ့အတွက် မုန့်ဖတ်အနေတော် ရလာပါက ဆယ်ပေးပြီး လက်နှင့်စမ်းကြည့်ပါ
• မုန့်ဖတ်အနေတော် ရလာပါက ဇကာထဲသို့ သွန်ချပေးပြီး ရေအေးနှင့် ဆေးချပေးပါ
• ရေအေးနှင့် ဆေးပြီးတာနဲ့ ဇကာထဲမွာဘဲ ရေစစ်ထားပါ

အုန်းနို့ဟင်းရည်ချက်ရန် ပါဝင်ပစ္စည်းများ

1. ဆီသတ်ထားသော အသားတုဟင်း
2. ပဲအစိမ်းမှုန့် -ထမင်းပေါင်းအိုး ဆန်ချင်ဗူး တစ်ဗူးခွဲ
3. ကြက်သွန်နီ - အလုံးသေး ဆယ်လုံးခန့်
4. အုန်းဆီချက်ပြီးသား - ထမင်းစားဇွန်း ငါးဇွန်း
5. အရသာမှုန့် - လက်ဖက်ရည်ဇွန်း တစ်ဇွန်း
6. ဆား - လက်ဖက်ရည်ဇွန်း တစ်ဇွန်း
7. ရေ - မုန့်လုပ်ရာတွင် ချင်တွယ်သောခွက် ဆယ့်ငါးခွက်

အုန်းနို့ဟင်းရည်ချက်ပုံ

• ပါဝင်ပစ္စည်းများကို အဆင်သင့် ပြင်ထားပါ
• ကြက်သွန်နီကို အခွံခွာပြီး ရေဆေးထားပါ
• ကြက်ဥကို ကျက်အောင်ပြုပ်ပြီး အခွံခွာကာ မထူမပါးလေးတွေ လှီးထားပါ
• ဇောက်နက်သော အနေတော် အိုးထဲမှာ ရေနှင့် ပဲမှုန့်တို့ထည့်ပြီး ပဲမှုန့်များ ပျော်သွားအောင် ဖျော်ပေးပါ
• ပြီးတာနဲ့ မီးဖိုပေါ်တင်ပြီး အဆက်မပြတ် မွှေပေးပါ
• ပဲများပျစ်လာတာနဲ့ ဆီသတ်ထားသော အသားတုဟင်း ဆား အရသာမှုန့် နှင့် အုန်းနို့တို့ထည့်ပြီး တည်ပေးပါ
• ဟင်းရည်အိုး ပွက်ပွက်ဆူလာတာနဲ့ ကြက်သွန်နီနှင့် လှီးထားသော ကြက်ဥများ ထည့်ပေးပါ
• ကြက်သွန်နီများ နူးလာတာနဲ့ ဟင်းရည်အရသာကို မြည်းပေးပါ
• ဟင်းရည်အရသာကို မိမိစိတ်ကြိုက် ပြင်ပေးပြီး ဟင်းရည်အပျစ်အကျဲကိုလဲ  မိမိစိတ်ကြိုက် ပြင်ပေးပြီးပါက အသားတု အုန်းနိ့ဟင်းရည် ရပါပြီ။

မုန့်ပွဲပြင်ရန် ပါဝင်ပစ္စည်းများ

1. အုန်းနို့ဟင်းရည် - လိုသလောက် ပြင်ထားပါ
2. ကြာဇံကြီး မုန့်ဖတ် - လိုသလောက် ပြင်ထားပါ
3. အကြွတ်ကြော် - လိုသလောက် ပြင်ထားပါ
4. ငါးဖယ်ကြော်  - လိုသလောက် ပြင်ထားပါ
5. ကြက်ဥ - ခြောက်လုံး
6. သံပုရာသီး - လိုသလောက် သုံးပေးပါ
7. နံနံပင် - လိုသလောက် သုံးပေးပါ
8. ကြက်သွန်နီ - အနေတော် နှစ်လုံး
9. ငရုတ်သီး အလှော်မှုန့် - လိုသလောက် ပြင်ထားပါ

မုန့်ပွဲပြင်ရန်

1. ကြာဇံကြီး မုန့်ဖတ်များကို ပြင်ထားပါ
2. အုန်းနို့ဟင်းရည်ကို ပြင်ထားပါ
3. ကြက်ဥကို ကျက်အောင်ပြုပ်ပြီး အခွံခွာကာ ထက်ဝက်ခြမ်းထားပါ
4. သံပုရာသီးကို ရေဆေးပြီး အစိတ်တွေ လှီးထားပါ
5. နံနံပင်ကို ရေဆေးပြီး အနေတော်လေးတွေ လှီးပေးထားပါ
6. ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးထားပေးပါ
7. ငရုတ်သီး အလှော်မှုန့်တို့ကို ပြင်ထားပါ
8. ငါးဖယ်ကြော်နှင့် အကြွတ်ကြော်တို့ကို ပြင်ထားပါ
9. အားလုံးအဆင်သင့် ဖြစ်တာနဲ့ ပန်းကန်တစ်လုံးထဲမှာ မိမိစားနိူင်သလောက် မုန့်ဖတ် အကြွတ်ကြော် ငရုတ်သီး အလှော်မှုန့် နံနံပင် ကြက်သွန်နီ  သံပုရာရည်နှင့် အုန်းနို့ဟင်းရည်တို့ကို သင့်သလို ထည့်ပေးပါ
10. အရသာ အားလုံးထည့်ပြီးတာနဲ့ အရသာမြည်းကာ မိမိစိတ်ကြိုက် အရသာ ရလာအောင် လိုသလို ပြင်ပေးပြီး အသားတု အုန်းနို့ဟင်းရည်ဆမ်း ကြာဇံကြီး စိမ့်စိမ့်လေးကို  စားသုံးနိူင်ပါပြီ။