Wednesday 15 August 2018

သရက်သီးစိမ်းသုပ်







တစ်ပါတ်တစ်ရက် ဗီယက်နမ်စျေးကို သွားကြရင်း သရက်သီးစိမ်းလေးတွေ ဝယ်လာခဲ့ပါတယ် ဒါကြောင့်မို့လို့ ဒီနေ့တော့ ထမင်းပူပူလေးနဲ့ အရမ်းလိုက်ဖက်တဲ့ ချဉ်ငံစပ် သရက်သီးစိမ်းသုပ်လေး သုပ်ဖြစ်လို့ မာမာပြင်ဆင်ထားတဲ့ သရက်သီးစိမ်းသုပ် ချဉ်ငံစပ်သုပ်နည်းလေး မျှဝေလိုက်ပါတယ်။

ပါ၀င်ပစ္စည်းများ

သရက်သီးစိမ်း - ခပ်ကြီးကြီး တစ်လုံး
အရသာမှုန့် -  လက်ဖက်ရည်ဇွန်း တစ်ဝက်
ငရုတ်သီး အလှော်မှုန့် -  စားနိူင်သလောက်
ပုဇွန်ခြောက်ထောင်း -  လက်ဖက်ရည်ဇွန်း နှစ်ဇွန်း
မြေပဲလှော် - လက်ဖက်ရည်ဇွန် သုံးဇွန်း
ငါးငံပြာရည် - ထမင်းစားဇွန်း တစ်ဇွန်းသာသာ
မြေပဲဆီစိမ်း - ထမင်းစားဇွန်း နှစ်ဇွန်း
ကြက်သွန်ဖြူ ဆီချက် - ထမင်းစားဇွန်း နှစ်ဇွန်းသာသာ
အရသာမှုန့် - လက်ဖက်ရည်ဇွန်း တစ်ဇွန်း
ငရုတ်သီး အလှော်မှုန့် - စားနိူင်သလောက်
ပဲအကျက်မှုန့် - ထမင်းစားဇွန်း တစ်ဇွန်းသာသာ

ပြင်ဆင်ပုံ
သရက်သီးစိမ်းကို အညှာဖက်မှလှီးပြီး ရေနိူင်နိူင်ဆေးကာ အစေးထုတ်ပေးပါ
ပြီးတာနဲ့ အခွံခွာကာ သရက်သီးခြစ်နှင့် ခြစ်ပေးပါ
ပုဇွန်ခြောက်ကို မညက်တစ်ညက် ထောင်းထားပါ
မြေပဲလှော်ပြီးသားကို အခွံခြွတ်ပြီး သန့်စင်ပေးထားပါ 
အားလုံးအဆင်သင့် ဖြစ်တာနဲ့ ပါ၀င်ပစ္စည်းများ အားလုံးကို ဇလုံတစ်လုံးထဲထည့်ကာ ခပ်ဖွဖွလေး ရောနယ်ပေးပါ
အားလုံးသမ သွားတာနဲ့ အရသာမြည်းပြီး လိုသလို ပြင်ပေးကာ စားသုံးရန် ပြင်ပေးပါ
အရသာ ရှိလှသော သရက်သီးသုပ် ချဉ်ငံစပ်လေးကို စားသုံးရန်အသင့် ပြင်ပေးနိူင်ပါပြီ။

No comments:

Post a Comment