ဒီနေ့တော့ ရာသီဥတု အကူးအပြောင်းလေးမှာ ခေါင်းထဲအုံခဲခဲ ဖြစ်နေတာနဲ့ အိမ်မှာအဆင်သင့်ရှိတဲ့ မျှစ်ကြွတ်ပြုပ်ပြီးသားလေးတွေကို ချဉ်ချဉ်ငံငံစပ်စပ်လေး ထောင်းပါတယ်။
ပါဝင်ပစ္စည်းများ
- မျှစ်ပြုပ်ပြီးသား - ဆယ်ချောင်း
- ယိုးဒယား ငါးပိရည် - ထမင်းစားဇွန်း တစ်ဇွန်း
- ယိုးဒယား ဂဏန်းငံပြာရည် - လက်ဖက်ရည်ဇွန်း တစ်ဇွန်း
- သံပုရာသီး - တစ်လုံး
- ထန်းလျှက်ခဲ - အနေတော် တစ်ခဲ
- ကြက်သွန်ဖြူ - အမွှာကြီးကြီး ငါးမွှာ
- ငရုတ်သီး အခြောက်တောင့် - ငါးတောင့်ခန့်
- နံနံပင် - မိမိနှစ်သက်သလောက် ထည့်ပါ
- ချယ်ရီခရမ်းချဉ်သီး - ဆယ်လုံးခန့်
- အရသာမှုန့် - လက်ဖက်ရည်ဇွန်း တစ်ဇွန်း
ပြင်ဆင်ပုံ
- ပြုပ်ပြီးသား မျှစ်များကိုမိမိနှစ်သက်တဲ့ ပုံစံလေးတွေ ရလာအောင် လှီးပေးထားပါ
- ပါဝင်ပစ္စည်းများ အားလုံးကို အဆင်သင့် ပြင်ထားပါ
- ကြက်သွန်ဖြူကို အခွံခွာပြီး ရေဆေးထားပါ
- နံနံပင်ကို ရေဆေးပြီး ခပ်ကြမ်းကြမ်း လှီးထားပါ
- ခရမ်းချဉ်သီးကို ရေဆေးပြီး ထက်ဝက်ခြမ်းထားပါ
- သံပုရာသီးကို ရေဆေးပြီး အစိတ်လေးတွေ လှီးထားပါ
- အားလုံးအဆင်သင့် ဖြစ်တာနဲ့ ငရုတ်ဆုံ ခပ်ကြီးကြီးထဲမှာ ထန်းလျှက်ခဲ ကြက်သွန်ဖြူနှင့် ငရုတ်သီးတောင့်တို့ကို ထည့်ထောင်းပေးပါ
- မညက်တစ်ညက် အနေအထားလေး ရလာတာနဲ့ သုံးရမဲ့ ငါးပိရည် ငံပြာရည်နှင့် အရသာမှုန့်တို့ ကို ထည့်ပေးပြီး ဇွန်းနှင့်မွှေပေးပါ
- ပြီးတာနဲ့ သံပုရည်ညှစ်ထည့်ကာ နံနံပင် ခရမ်းချဉ်သီးနှင့် မျှစ်တို့ကို ထည့်မွှေပေးပါ
- အားလုံးအရသာ သမသွားတာနဲ့ အရသာကို မြည်းပေးပြီး ချိုချဉ်ငံစပ် အရသာကို မြည်းပေးကာ လိုအပ်တာကို မိမိစိတ်ကြိုက် အရသာ ရလာအောင် ပြင်ပေးပါ
- မိမိစိတ်ကြိုက် အရသာ ရလာပြီ ဆိုရင်တော့ ချိုချဉ်ငံစပ် မျှစ်ထောင်းလေးကို စားသုံးရန် ပြင်ဆင်ပေးနိူင်ပါပြီရှင် ။
No comments:
Post a Comment