ဒီနေ့တော့ ပန်းဂေါ်ဖီစိမ်းကို ကြက်ဥနဲ့ မွှေကြော်လေး ကြော်ပါတယ် ဒါကြောင့်မို့လို့ အရန်ဟင်းတစ်မယ်အတွက် လွယ်ကူမြန်ဆန်စွာ ပြင်ဆင်နိူင်အောင် ထမင်းပူပူလေးနဲ့ လိုက်ဖက်လွန်းတဲ့ ပန်းဂေါ်ဖီစိမ်း အစိမ်းကြော် ကြော်နည်လေးးကို မျှဝေလိုက်ပါတယ်ရှင်။
ပါ၀င်ပစ္စည်းများ
- ပန်းဂေါ်ဖီစိမ်း - အနေတော်
- ကြက်သွန်နီ - အနေတော် တစ်ခြမ်း
- ဆား - လက်ဖက်ရည်ဇွန်း တစ်ဝက်
- အရသာမှုန့် - လက်ဖက်ရည်ဇွန်း တစ်ဝက်
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆီ - ထမင်းစားဇွန်း ငါးဇွန်း
- ကြက်ဥ - တစ်လုံး
ပန်းဂေါ်ဖီစိမ်းပြုပ်ရန်
- ပန်းဂေါ်ဖီစိမ်းကို အပွင့်လိုက် ရေဆေးပြီး အနေတော်လေးတွေ လှီးထားပါ
- ဇောက်နက်သော အိုးထဲမှာ ပန်းပွင့်ပြုပ်လောက်ရုံ ရေနှင့် ဆား လက်ဖက်ရည်ဇွန်း တစ်ဇွန်း ဆီ ထမင်းစားဇွန်းတို့ထည့်ကာ ပွက်ပွက်ဆူအောင် တည်ပေးပါ
- ရေဆူလာတာနဲ့ ပန်းဂေါ်ဖီစိမ်းလေးတွေကိုထည့်ကာ နှစ်မိနစ်လောက် ပြုပ်ပေးပါ
- ပြီးတာနဲ့ ရေပူများသွန်ပြီး ရေစစ်ထားပါ
ပြင်ဆင်ပုံ
- ပန်းဂေါ်ဖီစိမ်းနှင့်အတူ ပါဝင်ပစ္စည်းများကို အဆင်သင့် ပြင်ထားပါ
- ကြက်သွန်နီကို အခွံခွာပြီး ရေဆေးကာ ခပ်ပါးပါးလေးတွေ လှီးထားပါ
- အားလုံးအဆင်သင့် ဖြစ်တာနဲ့ ဒယ်အိုးထဲမှာ ဆီနှင့် နနွင်းမှုန့်တို့ကိုထည့်ပြီး အပူပေးပါ
- ဆီပူလာလျှင် ကြက်သွန်နီကို နွမ်းလာရုံလေး ထည့်ကြော်ပေးပါ
- ပြီးတာနဲ့ ပန်းဂေါ်ဖီ ဆားနှင့် အရသာမှုန့်တို့ ထည့်မွှေပေးပါ
- အရသာ သမသွားအောင် မွှေပေးပြီးတာနဲ့ ကြက်ဥကို ဖောက်ထည့်ပြီး မွှေပေးပါ
- အသီးအရွက်ကြော် ဖြစ်တဲ့အတွက် အရမ်းနွမ်းပြီး အသီးအရွက်များ အရောင်ပြောင်းတဲ့အထိ ကြော်စရာမလိုတဲ့အတွက် ခနဘဲကြော်ပေးပါ
- ကြက်ဥကျက်တာနဲ့ ပန်းဂေါ်ဖီနှင့် ရောမွှေပေးကာ အရသာမြည်းပြီး လိုသလို ပြင်ပေးပါ
- မိမိစိတ်ကြိုက် အရသာ ရပြီဆိုတာနဲ့ မီးပိတ်ပေးပါ
- အရသာ သမသွားတာနဲ့ အရမ်းစားလို့ ကောင်းလွန်းတဲ့ ပန်းဂေါ်ဖီစိမ်း အစိမ်းကြော်လေး ရပါပြီ။
No comments:
Post a Comment