ဒီနေ့တော့ သတ်သတ်လွတ် စားရတာ အဆင်ပြေလွန်းတဲ့ မတ်ပဲဒိုဆာလေး လုပ်စားဖြစ်ပါတယ် လုပ်ရတာလဲ လွယ်ကူပြီး စားရတာလဲ ကောင်းလွန်းတဲ့အတွက် မာမာပြင်ဆင်ပြီး လုပ်ထားတဲ့နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- မတ်ပဲ - ထမင်းပေါင်းအိုး ဆန်ချင်ဗူး နှစ်ဗူး
- ရေ - ထမင်းပေါင်းအိုး ဆန်ချင်ဗူး နှစ်ဗူး
- ဆား - လက်ဖက်ရည်ဇွန်း တစ်ဇွန်း
- အရသာမှုန့် - လက်ဖက်ရည်ဇွန်း တစ်ဇွန်း
- ပူစီနံ - သုံးညွန့်ခန့်
- ချင်း - တစ်လက်မ
- ငရုတ်သီးစိမ်း - နှစ်တောင့်ပူ
- စီနံ - ထမင်းစားဇွန်း သုံးဇွန်းသာသာ (လှီးပြီးသား)
- ကြက်သွန်နီ - အလုံးကြီးကြီး တစ်လုံး
- ခရမ်းချဉ်သီး - အနေတော် သုံးလုံး
- ဆီ - ထမင်းပေါင်းအိုး ဆန်ချင်ဗူး တစ္ဗူးခြဲ
- မကပ်သောဒယ်အိုး - တစ်လုံး
- ယောက်ချိုဇွန်းမှုတ် - တစ်ချောင်း
ပြင်ဆင်ပုံ
- မတ်ပဲကို ပဲစိမ်းနံ့ပျောက်အောင် ရေလေးထပ်လောက်ဆေးပြီး ရေမြုပ်အောင် လေးနာရီလောက် စိမ်ထားပါ
- ငရုတ်သီးစိမ်းကို အညှာခြွေပြီး ရေဆေးထားပါ
- ပူစီနံကို ရေဆေးပြီး ရေစစ်ထားပါ
- ချင်းကို အခွံခွာပြီး ရေဆေးထားပါ
- ကြက်သွန်နီကို အခွံခွာပြီး ရေဆေးကာ ခပ်သေးသေးလေးတွေ လွီးထားပါ
- ခရမ်းချဉ်သီးကို ရေဆေးပြီး အလယ်မှ အစေ့များ ဖယ်ပေးကာ ခပ်သေးသေးလေးတွေ လွီးထားပါ
- ပူစီနံကို ရေဆေးပြီး ခပ်ပါးပါးလေးတွေ လွီးထားပါ
- ဆီနှင့်အတူ ပါ၀င်ပစ္စည်းများကို ပြင်ထားပါ
- ရေစိမ်ထားတာ ပဲများပွလာပါက ရေစစ်ပေးပြီး ဗလင်ဒါထဲမှာ ထည့်ပေးပါ
- ပဲနှင့်အတူ ဆား အရသာမှုန့် ငရုတ်သီးစိမ်း ချင်းနှင့် ရေတို့ထည့်ပြီး ညက်နေအောင် ကြိတ်ပေးပါ
- အားလုံးအဆင်သင့် ဖြစ်ပါက ဒယ်အိုးကို မီးဖိုပေါ် တင်ပေးပါ
- ပြီးတာနဲ့ အိုးကို ဆီသုတ်ပေးပြီး ဆီပူတာနဲ့ ပဲအနှစ်ကို ထည့်ဖို့ ပြင်ပေးပါ
- ပဲကို ဇွန်းမှုတ်နှင့် မခပ်ခင် အရသာ သမသွားအောင် မွှေပေးပါ
- ပြီးတာနဲ့ တစ်ဇွန်းစာ အပြည့်ခပ်ပြီး ဒယ်အိုးထဲကို ဖြန့်ထည့်ပေးပါ
- ပဲအနှစ်ထည့်ပြီးတာနဲ့ လှီးထားသော ကြက်သွန်နီ ခရမ်းချဉ်သီးနှင့် ပူစီနံတို့ကို ဖြန့်ပြီးထည့်ပေးပါ
- ပြီးတာနဲ့ အပေါ်ဖက်ကို ဆီနှင့် ခပ်ရွှဲရွှဲလေး လိုက်သုတ်ပေးပြီး အသီးအရွက်များကို ယောင်းမလေးနှင့် အသာလေး လိုက်ဖိပေးပါ
- အောက်ဖက်မှ ခပ်ကြွတ်ကြွတ်လေး ဖြစ်လာပြီဆိုရင် ယောင်းမနှင့် ထိုးကလော်ပြီး လှန်ပေးပါ
- နောက်တစ်ဖက် လှန်ပေးပြီးတာနဲ့ မိနစ်ဝက်လောက် ထားပြီးတာနဲ့ အိုးပေါ်မှ ဖယ်ပေးပါ
- အထက်ပါ နည်းအတိုင်း ပဲအနှစ်များ ကုန်တဲ့အထိ လုပ်ပေးပြီးပါက မတ်ပဲဒိုဆာ ပူပူလေးကို စားသုံးရန် ပြင်ပေးနိူင်ပါပြီ။
No comments:
Post a Comment