မာမာ ဒီနေ့ ငါးကို နံနံပင် သံပုရာသီး ငရုတ်သီးစိမ်း ကြက်သွန်ဖြူ ဂေါ်ဖီတို့နဲ့ အလှဆင်ကာ တို့နဲ့ ချဉ်ငံစပ် မွှေးမွှေးလေး ပေါင်းထားပါတယ်။
ပေါင်းရတာ လွယ်သလောက် စားလို့အရမ်းကောင်းတဲ့ ငါးပေါင်းလေးမို့လို့ မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ငါးအရသာနယ်ရန်
- သန့်စင်ပြီးသော ငါးတစ်ကောင် - 400 g
- ဆား - လက်ဖက်ရည်ဇွန်း တစ်ဝက်
- အရသာမှုန့် - လက်ဖက်ရည်ဇွန်း တစ်ဇွန်း (ကြက်သားမှုန့်ကို သုံးထားပါတယ်)
- နနွင်းမှုန့် - လက်ဖက်ရည်ဇွန်း လေးပုံတစ်ပုံ
ငါးပေါင်းပြီး ဟင်းပွဲပြင်ရန်
- ပါးပါးရိတ်ရိတ် လှီးထားသော ဂေါ်ဖီ - အနည်းငယ်
- လက်တစ်ခန့် လှီးထားသော နံနံပင် - သုံးပင်ခန့်
- ပါးပါးလှီးထားသော ကြက်သွန်ဖြူ - အမွှာကြီးကြီး လေးမွှာ
- ပါးပါးလှီးထားသော ငရုတ်သီးစိမ်း - သုံးတောင့်
- ပါးပါးလှီးထားသော သံပုရာသီး - တစ်လုံး
ပြင်ဆင်ပုံ
- ငါးတစ်ကောင်လုံး ထည့်လို့ အဆင်ပြေမည့် ဗန်းကိုခင်းပြီး အရသာများ နယ်ထားသော ငါးကိုအကောင်လိုက် တင်လိုက်ပါ
- ငါးထည့်ထားသော ဗန်းဆန့်ဝင်လောက်မည့် အောက်ခံအိုးထဲကို ရေ တစ်ဝက်လောက် ထည့်ကာ ခုံလေး ထည့်ပေးပါ
- ထိုခုံလေး အပေါ်မှာ ငါးထည့်ထားသော ဗန်းကိုတင်ကာ အိုးအဖုံး အုပ်ပေးပါ
- မီးကို အနေတော်လောက်နှင့် ငါးကျက်သွားအောင် ဆယ့်ငါးမိနစ်ခန့် ပေါင်းပေးပါ
- ငါးကျက်သွားတာနဲ့ မီးပိတ်ပေးပါ
ငါးသံပုရာ ဟင်းပွဲပြင်ဆင်ပုံ
- ငါးပေါင်းထည့်မည့် ပန်းကန်ထဲမှာ လှီးထားသော ဂေါ်ဖီကို အရင်ဆုံး ဖြန့်ခင်းပေးပါ
- ထိုအပေါ်ကမှ နံနံပင်ကို ဖြန့်ထည့်ပေးကာ ငါးပေါင်းပြီးသားကို ထိုအပေါ်မှာ တင်ပေးပါ
- ငါးအပေါ်မှာ သံပုရာကွင်း ကြက်သွန်ဖြူနှင့် ငရုတ်သီးစိမ်းတို့ကို မိမိနှစ်သက်လို ပြင်ကာ တင်ပေးပါ
- ထိုအပေါ်ကနေမှ ငါးပေါင်းစဉ်က ထွက်လာသော ငါးပေါင်းရည်ကို ဆမ်းပေးကာ သုံးဆောင်နိူင်ပါပြီ။
No comments:
Post a Comment