Sunday 19 March 2023

ပုဇွန်အစိမ်းထောင်း

 


ဒီနေ့တော့ tiger prawns  အစိမ်းလေးတွေ ဝယ်လာပြီး ထောင်းစားဖြစ်ပါတယ် ထမင်းမစားချင်တဲ့ နေ့တွေဆို အခုလိုချိုချဉ်ငံစပ်လေးတွေ စားချင်စိတ် ပေါ်တတ်ပါတယ်။

 အခုက ပုဇွန်ကို အစိမ်းစားရတာ ဖြစ်တဲ့အတွက် မာမာကတော့ ပုဇွန်ကို အခွံခွာပြီးတာနဲ့ အရင်ဆုံး ဆားနဲ့တစ်ထပ် ဆေးပါတယ် ပြီးတော့ သံပုရာရည်နဲ့ တစ်ထပ်ဆေးသလို နောက်တစ်ခါ 7up အချိုရည်လေးနဲ့ ဆယ်မိနစ်လောပ် ထပ်စိမ်ပေးပါတယ်။

အထပ်ထပ် အခါအခါ ဆေးပြီးတာနဲ့ ရေခဲတုံးလေးတွေနဲ့  ဆယ်မိနစ်လောက် ထပ်စိမ်ပေးပြီးမှ ချိုချဉ်ငံစပ် အရသာလေး ရလာအောင် ထောင်းပါတယ်။

အဲဒီတော့မှ ပါးစပ်ထဲမှာ ခံတွင်းတွေ့သလိုလဲ ခံစားရပါတယ် ဒါကြောင့်မို့လို့ မာမာပြင်ဆင်ပြီး ထောင်းထားတဲ့ နည်းလေးကို မျှဝေပေးလိုက်ပါတယ်ရှင်။

ပါဝင်ပစ္စည်းများ
  1. Tiger prawns  - ဆယ်ကောင်
  2. ဆား - လက်ဖက်ရည်ဇွန်း နှစ်ဇွန်း
  3. သံပုရာရည် - ထမင်းစားဇွန်း နှစ်ဇွန်း
  4. 7up အချိုရည် - ထမင်းစားဇွန်း၁၅ဇွန်း
  5. ယိုးဒယား ငါးပိရည် - ထမင်းစားဇွန်း တစ်ဇွန်း
  6. ယိုးဒယား ဂဏန်းငံပြာရည် - လက်ဖက်ရည်ဇွန်း တစ်ဇွန်း
  7. သံပုရာသီး - တစ်လုံး
  8. ထန်းလျှက်ခဲ - အနေတော် တစ်ခဲ
  9. ကြက်သွန်ဖြူ - အမွှာကြီးကြီး ငါးမွှာ
  10. ငရုတ်သီး အခြောက်တောင့် - ငါးတောင့်ခန့်
  11. မြေပဲလှော် - မိမိနှစ်သက်သလောက် ထည့်ပါ
  12. ချယ်ရီခရမ်းချဉ်သီး - ဆယ်လုံးခန့်
  13. အရသာမှုန့် - လက်ဖက်ရည်ဇွန်း တစ်ဇွန်း
ပုဇွန်ဆေးရန်
  • ပုဇွန်ထုတ်များကို အခွံခွာကာ ခေါင်းများကို ဖယ်ပေးပြီး ကြောဖက်မှ အမည်းကြောင်းကိုလဲ ဖယ်ပေးလိုက်ပါ
  • ပြီးတာနဲ့ အခွံခွာထားတဲ့ ပုဇွန်များကို ဆားနဲ့အရင်ဆုံး နယ်ကာ ဆေးပေးပါ
  • နောက်တစ်ခါ သံပုရာရည်နဲ့ နယ်ပေးကာ ရေနဲ့ ဆေးပေးပါ
  • နောက်တစ်ကြိမ် 7up အချိုရည်နဲ့ ငါးမိနစ်လောက် စိမ်ကာ ရေဆေးပေးပါ
  • နောက်ဆုံးအနေနဲ့ ပုဇွန်ကို ရေခဲတုံးလေးတွေနဲ့ ဆယ်မိနစ်လောက် စိမ်ထားပေးပါ
ပြင်ဆင်ပုံ
  • ပါဝင်ပစ္စည်းများ အားလုံးကို အဆင်သင့် ပြင်ထားပါ
  • ကြက်သွန်ဖြူကို အခွံခွာပြီး ရေဆေးထားပါ
  • ခရမ်းချဉ်သီးကို ရေဆေးပြီး ထက်ဝက်ခြမ်းထားပါ
  • သံပုရာသီးကို ရေဆေးပြီး အစိတ်လေးတွေ လှီးထားပါ
  • အားလုံးအဆင်သင့် ဖြစ်တာနဲ့ ငရုတ်ဆုံ ခပ်ကြီးကြီးထဲမှာ ထန်းလျှက်ခဲ  ကြက်သွန်ဖြူနှင့် ငရုတ်သီးတောင့်တို့ကို ထည့်ထောင်းပေးပါ
  • မညက်တစ်ညက် အနေအထားလေး ရလာတာနဲ့ သုံးရမဲ့ ငါးပိရည် ငံပြာရည်နှင့် အရသာမှုန့်တို့ ကို ထည့်ပေးပြီး ဇွန်းနှင့်မွှေပေးပါ
  • ပြီးတာနဲ့ သံပုရည်ညှစ်ထည့်ကာ ခရမ်းချဉ်သီးနှင့် ပုဇွန်ထုတ်တို့ကို ထည့်မွှေပေးပါ
  • အားလုံးအရသာ သမသွားတာနဲ့ အရသာကို မြည်းပေးပြီး ချိုချဉ်ငံစပ် အရသာကို မြည်းပေးကာ လိုအပ်တာကို မိမိစိတ်ကြိုက် အရသာ ရလာအောင် ပြင်ပေးပါ
  • မိမိစိတ်ကြိုက် အရသာ ရလာပြီ ဆိုရင်တော့ မြေပဲလှော်ထည့်ပေးပြီးတာနဲ့ ချိုချဉ်ငံစပ်  ပုဇွန်အစိမ်းထောင်းကို  ပြင်ဆင်ပေးနိူင်ပါပြီရှင် ။

No comments:

Post a Comment