ဒီနေ့တော့ အရည်သောက် တစ်မယ်အတွက် ဝက်နံရိုးလေးတွေ ဝယ်လာပြီး အရိုးပြုပ်လေး ပြုပ်ဖြစ်ပါတယ် အရိုးပြုပ်လေး ပြုပ်ပြီးတာနဲ့ ပုဇွန်ဖက်ထုတ် လေးတွေနဲ့ ဟင်းချိုရည် ချက်ဖြစ်ပါတယ်။
ဖက်ထုတ်ဟင်းချိုထဲကို မုန့်ညှင်းစိမ်း အရွက်လေးတွေရယ် အပ်မှိုလေးတွေရယ် ထည့်ချက်ထားတဲ့အတွက် ဟင်းချိုရည် ချိုချိုလေးကို ရစေပါတယ် ဒါကြောင့်မို့လို့ မာမာပြင်ဆင်ပြီး ချက်ထားတဲ့ ဟင်းချိုချက်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- အရိုးအသား တွဲနေသော ဝက်နံရိုး - 1 kg
- အဆင်သင့် လုပ်ထားသော ပုဇွန်ဖက်ထုတ် - ဆယ်ခု
- ချင်း - တစ်လက်မခန့်
- ကြက်သွန်ဖြူ - အမွှာကြီးကြီး ဆယ့်နှစ်မွှာ
- အချိုမှုန့် - လက်ဖက်ရည်ဇွန်း တစ်ဇွန်း
- ဆား - လက်ဖက်ရည်ဇွန်း တစ်ဇွန်းသာသာ
- ငရုတ်ကောင်းမှုန့် - လက်ဖက်ရည်ဇွန်း တစ်၀က်
- အပ်မှို - မိမိနှစ်သက်သလောက်
- မုန့်ညှင်းစိမ်း - စားနိူင်သလောက်
ပြင်ဆင်ပုံ
- ဖက်ထုတ်များကို အဆင်သင့် ပြင်ထားပါ
- အပ်မှိုကို ရေဆေးထားပါ
- မုန့်ညှင်းစိမ်းကို အနေတော်လေးတွေလှီးကာ ရေဆေးထားပါ
- ဝက်နံရိုးကို ရေစင်အောင်ဆေးပြီး အနေတော် အတုံးလေးတွေ ပိုင်းပေးပါ
- ချင်းကိုအခွံခွာပြီး ရေဆေးကာ ခပ်ပါးပါး လှီးထားပါ
- ကြက်သွန်ဖြူကို အခွံခွာကာ ရေဆေးပြီး ဓါးပြားရိုက်ထားပါ
- ဇောက်နက်သော အိုးထဲမှာ ရေခပ်များများထည့်ပြီး ဝက်နံရိုးထည့်ကာ ပြုပ်ပေးပါ
- ရေပွက်ပွက် ဆူလာတာနဲ့ သုံးမိနစ်လောက် ပြုပ်ပေးကာ ရေများကို သွန်ပေးပါ
- ပြီးတော့မှ အိုးထဲမှာ ချင်း ဆား အချိုမှုန့် ရေနှင့် ဝက်နံရိုးများ နူးတဲ့အထိ ပြုပ်ပေးပါ
- ဝက်နံရိုး ချင်း ဆား နှင့် ရေမြုပ်အောင်ထည့်ကာ ပြုပ်ပေးပါ
- ရေကိုပွက်ပွက် ဆူအောင်တည်ပေးရင်း ရေလိုအပ်ပါက ထပ်ထပ်ထည့်ပေးပါ
- ရေပွက်ပွက် ဆူလာပြီး အပေါ်ယံမှာ အမြှပ်များ တက်လာပါက အပေါ်ယံ အမြှုပ်များ ခပ်ပြီးသွန်သွန်ပေးပါ
- ဝက်နံရိုးအနံ့ ပျောက်လာအောင် နာရီ၀က်လောက် အရင်ပြုပ်ပေးပြီး တက်လာသမျှ အမြုပ်များကို ခပ်ပြီးသွန်ပေးပါ
- ဝက်နံရိုးပြုပ်ရည် အမွှေးနံ့ သင်းလာတာနဲ့ ဆား ဖက်ထုတ် မုန့်ညှင်းစိမ်း အချိုမှုန့်နှင့် ရေလိုသလောက်ထည့်ကာ ဟင်းရည်ကို ပွက်ပွက်ဆူအောင် တည်ပေးပါ
- ဟင်းရည်အရသာကို မြည်းပြီး မိမိစိတ်ကြိုက် အရသာ ရလာအောင် ပြင်ပေးပြီး ဓါးပြားရိုက်ထားသော ကြက်သွန်ဖြူနှင့် ငရုတ်ကောင်းမှုန့်ထည့်ပေးကာ မီးမျှင်းမျှင်းနှင့် တည်ထားပါ
- ဟင်းရည်သောက်ခါနီး ပူနေပါမှ အရသာရှိပြီး မွှေးရနံ့သင်းပျံ့တဲ့ ဝက်နံရိုး အရသာကို ရမှာ ဖြစ်ပါတယ်။
- ဟင်းရည် အဆင်သင့် ဖြစ်တာနဲ့ အပ်မှိုထည့်ကာ သောက်သုံးရန် ပြင်ပေးနိူင်ပါပြီ။
No comments:
Post a Comment