Wednesday 4 November 2020

အောင်ဗလကြော် စိမ့်စိမ့်လေး




ဒီနေ့တော့ မြန်မာမုန့်တစ်မျိုးဖြစ်တဲ့ အောင်ဗလကြော်လေးတွေ ကြော်ဖြစ်ပါတယ် စားလို့အရမ်းကောင်းပြီး ပြင်ရဆင်ရတာလဲ အရမ်းမခက်ခဲတဲ့အတွက် မာမာပြင်ဆင်ပြီး ကြော်ထားတဲ့ နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ
  1. ဆန်မှုန့် - ထမင်းပေါင်းအိုး ဆန်ချင်ဗူး တစ်ဗူး
  2. ကောက်ညှင်းမှုန့် - ထမင်းပေါင်းအိုး ဆန်ချင်ဗူး သုံးဗူး
  3. နူးအိနေအောင် ပြုပ်ထားသော ကုလားပဲခြမ်း - ထမင်းပေါင်းအိုး ဆန်ချင်ဗူး သုံးဗူး
  4. အုန်းသီးမှုန့် - ထမင်းပေါင်းအိုး ဆန်ချင်ဗူး သုံးဗူး
  5. ဆား - လက်ဖက်ရည်ဇွန်း သုံးပုံတစ်ပုံ
  6. ရေ - ထမင်းပေါင်းအိုး ဆန်ချင်ဗူး တစ်ဗူး (လိုတိုးပိုလျှော့ လုပ်ပေးပါ)
  7. ဆီ - လိုသလောက် သုံးပေးပါ
  8. သကြား - ထမင်းပေါင်းအိုး ဆန်ချင်ဗူး တစ်ဗူးခွဲ

ပြင်ဆင်ပုံ
  • ကုလားပဲခြမ်းကို ရေဆေးပြီး ရေမြုပ်အောင်ထည့်ကာ နူးအိနေအောင် ပြုပ်ပေးပြီး အေအးခံထားပါ
  • ပြုပ်ထားသောပဲများ အေးလာတာနဲ့ ဇလုံခပ်ကျယ်ကျယ် တစ်လုံးထဲမှာ ပြုပ်ပြီးသားပဲများ ကောက်ညှင်းမှုန့် ဆန်မှုန့် အုန်းသီးမှုန့်နှင့် ဆားတို့ကို ထည့်ပေးပါ
  • ရေကို အမှုန့်များ ထည့်ထားသော ဇလုံထဲကို နည်းနည်းချင်း ထည့်ပေးပြီး နယ်ပေးပါ
  • မုန့်သားပျော့လာတဲ့အထိ ရေကိုထည့်ပြီး နယ်ပေးပါ
  • အုန်းသီးခြစ်ပြီးသား အစိုကိုသုံးပါက မုန့်သားစပ်ရာတွင် ရေကိုထည့်သင့်မှ ထည့်ပေးပါ
  • ကုလားပဲပြုပ်နှင့် အုန်းသီးအစိုတို့မှာ အရည်ပါ၀င်တဲ့အတွက် အရမ်းမပျော့စေရန် သတိထားပါ
  • ရေကို ချင့်ချိန်ပြီး ထည့်ပေးပါ ရေအရမ်းများရင်လဲ မုန့်သားက ပျော့ပြဲပြီး လုံးလို့မရဘဲ ဖြစ်တတ်ပါတယ်
  • မာမာက အုန်းသီးမှုန့် အခြောက်နဲ့ လုပ်တဲ့အတွက် ရေအနည်းငယ် ထည့်သုံးပါတယ်
  • မုန့်သားအနေတော်ဖြစ်ပါက မုန့်ကြော်ရာတွင် ဆီမပေါက်စေရန် အနည်းဆုံး လေးနာရီလောက် နှပ်ထားပေးပါ
  • မုန့်သားနှပ်ထားတုန်း သကြား ထမင်းပေါင်းအိုး ဆန်ချင်ဗူး တဗူးခြဲကို ရေ တမင်းပေါင်းအိုး ဆန်ချင်ဗူး သုံးဗူးထည့်ပြီး ခပ်ပြစ်ပြစ် အနေအထားရအောင် ကျိုထားပေးပါ
  • မုန့်သားနှပ်ထားချိန် လုံလောက်ပါက မုန့်သားကို လက္တစ္ဆုတ္စာ အလုံးလေးလောက် လုံးပေးပါ
  • ဆီကိုပူအောင်တည်ပြီးမှ မုန်းသားအလုံးကို လက်ဝါးနှစ်ဖက်ကြားထည့်ပြီး ခပ်ပြားပြားလေး ရလာအောင် ဖိပေးပြီးမှ ဆီအိုးထဲထည့်ပေးပါ
  • ကြော်နေစဉ် ဆီအရမ်း မပူအောင် မီးကို အနေတော် ထားပေးပါ
  • မုန်လုံးလေးများ တစ်ဖက်ရွှေဝါရောင် သန်းလာပါက နောက်တစ်ဖက်ကို လှန်ပေးပါ 
  • နောက်တစ်ဖက်ပါ ရွှေဝါရောင် သန်းလာပါက ဆယ်ပြီး ဆီစစ်ပေးပါ
  • ဆီစစ်သွားပါက အအေးခံထားသော သကြားရည်ထဲ စိမ်ပေးကာ ဆယ်ပြီးအခြောက်ခံပေးပါ
  • အခြောက်ခံထားစဉ် သကြားများ ပွင့်လာပါက မွှေးပြီးစိမ့်နေတဲ့ အောင်ဗလကြော်ကို စားသုံးရန် ပြင်ပေးနိုင်ပါပြီ။

No comments:

Post a Comment