မာမာ ဒီနေ့တော့ ကညွှတ်လေးတွေ ဝယ်လာဖြစ်လို့ သတ်သတ်လွတ်လေး ကြော်ပါတယ် ကြော်ရတာလဲ အရမ်းမြန်ပါတယ် ကညွှတ်ရဲ့အနံ့ကို တစ်ချို့က မကြိုက်ပါဘူး မာမာကတော့ အဲဒီအနံ့ကိုပျောက်အောင် ငရုတ်ကောင်းမှုန့်လေး နည်းနည်း ထည့်ကြော်ထားပါတယ်။
ဒါကြောင့်မို့လို့ အရန်ဟင်းတစ်မယ်အတွက် လွယ်ကူမြန်ဆန်စွာ ပြင်ဆင်နိူင်အောင် ထမင်းပူပူလေးနဲ့ လိုက်ဖက်လွန်းတဲ့ ကညွှတ် အစိမ်းကြော် ကြော်နည်လေးးကို မျှဝေလိုက်ပါတယ်ရှင်။
ပါ၀င်ပစ္စည်းများ
- ကညွှတ် - အနေတော် ဆယ်ပင်ခန့်
- ကြက်သွန်နီ - အနေတော် တစ်ခြမ်း
- ဆား - လက်ဖက်ရည်ဇွန်း တစ်ဝက်
- အရသာမှုန့် - လက်ဖက်ရည်ဇွန်း တစ်ဝက်
- ငရုတ်ကောင်းမှုန့် - အနည်းငယ်
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆီ - ထမင်းစားဇွန်း ငါးဇွန်း
ပြင်ဆင်ပုံ
- ကညွှတ်ကို ရေဆေးပြီး ခပ်ကြမ်းကြမ်းလေးထုကာ အနေတော် ပိုင်းဖြတ်ပေးပါ
- ကြက်သွန်နီကို အခွံခွာပြီး ရေဆေးကာ ခပ်ပါးပါးလေးတွေ လှီးထားပါ
- အားလုံးအဆင်သင့် ဖြစ်တာနဲ့ ဒယ်အိုးထဲမှာ ဆီနှင့် နနွင်းမှုန့်တို့ကိုထည့်ပြီး အပူပေးပါ
- ဆီပူလာလျှင် ကြက်သွန်နီကို နွမ်းလာရုံလေး ထည့်ကြော်ပေးပါ
- ပြီးတာနဲ့ ကညွှတ်နှင့် ဆားနှင့် အရသာမှုန့်တို့ ထည့်မွှေပေးပါ
- အရသာ သမသွားအောင် မွှေပေးပြီးတာနဲ့ အိုးအဖုံးကို တမိနစ်လောက် အုပ်ပေးပါ
- အသီးအရွက်ကြော် ဖြစ်တဲ့အတွက် အရမ်းနွမ်းပြီး အသီးအရွက်များ အရောင်ပြောင်းတဲ့အထိ ကြော်စရာမလိုတဲ့အတွက် ခနဘဲကြော်ပေးပါ
- ကညွှတ်များ အနည်းငယ် နွမ်းလာတာနဲ့ အိုးအဖုံးဖွင့်ပြီး အရသာ သမအောင် မွှေပေးပါ
- ပြီးတာနဲ့ အရသာမြည်းပြီး မိမိစိတ်ကြိုက် အရသာ ရလာအောင် လိုသလို ပြင်ပေးပါ
- မိမိစိတ်ကြိုက် အရသာ ရပြီဆိုတာနဲ့ ငရုတ်ကောင်းမှုန့် ထည့်မွှေပေးပြီး ပိတ်ပေးကာ ပန်းကန်ထဲ ပြောင်းထည့်ပေးပါ
- အရမ်းစားလို့ ကောင်းလွန်းတဲ့ ကညွှတ် အစိမ်းကြော်လေးကို ထမင်းပူပူလေးနဲ့ စားသုံးနိူင်ပါပြီ။
No comments:
Post a Comment