မုန့်ညှင်းချဉ်လေးတွေ လုပ်ထားတာ ရနေပြီမို့လို့ ဒီနေ့တော့ ဝက်သားနဲ့ အအီပြေလေး ကြော်ဖြစ်ပါတယ် ထမင်းပူပူလေးနဲ့ လိုက်ဖက်လွန်းတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- မုန့်ညှင်းချဉ် - ဟင်းပြင်ပန်းကန် အလတ်တစ်လုံးစာ
- ဝက်သားသုံးထပ်သား - မိမိနှစ်သက်သလောက် ထည့်ပါ
- ကြက်သွန်နီ - အနေတော် တစ်လုံး
- ကြက်သွန်ဖြူ - အမွှာကြီးကြီး နှစ်မွှာ
- ချင်း - ခပ်ပါး တစ်ပြား
- ငရုတ်သီး အရောင်တင်မှုန့် - လက်ဖက်ရည်ဇွန်း တစ်ဇွန်း
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- အရသာမှုန့် - လက်ဖက်ရည်ဇွန်း တစ်ဝက်သာသာ
- ဆား - လက်ဖက်ရည်ဇွန်း တစ်ဝက်
- ဆီ - ထမင်းစားဇွန်း နှစ်ဇွန်း
ပြင်ဆင်ပုံ
- မုန့်ညှင်းချဉ်ကို မိမိနှစ်သက်တဲ့ အနေအထားလေးတွေ ပိုင်းဖြတ်ထားပါ
- ဝက်သားကို ရေဆေးပြီး လက်နှစ်လုံးလောက်လေးတွေ လှီးထားပါ
- ကြက်သွန်ဖြူ ကြက်သွန်နီနှင့် ချင်းတို့ကို အခွံခွာပြီး ရေဆေးကာ သင့်တော်သလိုလေးဆွေ လှီးထားပါ
- အားလုံးအဆင်သင့် ဖြစ်တာနဲ့ ဒယ်အိုးထဲမှာ ဆီထည့်ပြီး နနွင်းမှုန့်ထည့်ကာ အပူပေးပါ
- ဆီပူလာတာနဲ့ ဝက်သားပို ထည့်ကြော်ပေးပါ
- ဝက်သား အသားမာလာတာနဲ့ ရေမြုပ်အောင်ထည့်ပြီး အဖုံးအုပ်ကာ တည်ပေးပါ
- ဝက်သားအိုးထဲမှာ ရေခမ်းလာတာနဲ့ ကြက်သွန်ဖြူ ကြက်သွန်နီ ချင်းနဲ့ ငရုတ်သီး အရောင်တင်မှုန့် တို့ကို ထည့်မွှေပေးပါ
- ကြက်သွန်များ အနည်းငယ် နွမ်းလာတာနဲ့ မုန့်ညှင်းချဉ်များကို ထည့်မွှေပေးပါ
- ပြီးတာနဲ့ ဆားနှင့် အရသာမှုန့် ထည့်မွှေပေးပါ
- အရသာ သမသွားတာနဲ့ အရသာကို မြည်းပေးကာ မိမိစိတ်ကြိုက် အရသာ ရလာအောင် ပြင်ပေးပြီး မီးပိတ်ပေးပါ
- ပြီးတာနဲ့ ဝက်သားမုန့်ညှင်းချဉ်ကြော်လေးကို ထမင်းပူပူလေးနဲ့ စားသုံးရန် ပြင်ပေးနိူင်ပါပြီ။
No comments:
Post a Comment