ဒီနေ့တော့ ပဲသီးလေးတွေ ဝယ်လာပြီး ပုဇွန်ခြောက်နဲ့ ကြော်ထားပါတယ် အခုကြော်တဲ့ ပဲသီးလေးတွေက အတောင့်ကြီးတဲ့ အတွက် ခပ်ပါးပါးလေးတွေ လှီးပြီးကြော်မှ စားလို့ကောင်းပါတယ်။
ဒီပဲသီးကြော်လေးကလဲ ထမင်းမြိန်ရာ အရန်ဟင်းတစ်မယ် ဖြစ်တဲ့အတွက် မာမာပြင်ဆင်ပြီး ကြော်ထားတဲ့ ကြော်နည်းအလွယ်လေးကို မျှေဝေလိုက်ပါတယ်ရှင်။
ပါ၀င်ပစ္စည်းများ
- ပဲသီး - နှစ်ဆယ့်ငါးတောင့်
- ကြက်သွန်နီ - အနေတော် တစ်ခြမ်း
- ကြက်သွန်ဖြူ - လေးမွှာ
- ဆီ - ထမင်းစားဇွန်း ငါးဇွန်း
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆား - လက်ဖက်ရည်ဇွန်း တစ်ဝက်သာသာ
- ဟင်းခတ်မှုန့် - လက်ဖက်ရည်ဇွန်း တစ်၀က်သာသာ
- ပုဇွန်ခြောက် - မိမိနှစ်သက်သလောက်
ပြင်ဆင်ပုံ
- ပဲသီးကို ရေဆေးပြီး အကြောသင်ကာ ခပ်စောင်းစောင်း မထူမပါးလေးတွေ လှီးထားပါ
- ပုဇွန်ခြောက်ကို ရေဆေးပြီး ရေနာရီဝက်ခန့် စိမ်ထားပါ
- ကြက်သွန်နီကို အခွံခွာပြီး ရေဆေးကာ ခပ်ပါးပါး လှီးထားပါ
- ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
- ဒယ်အိုးတစ်လုံးထဲမှာ ဆီကိုအပူပေးပြီး နနွင်းမှုန့်ထည့်ပါ
- ဆီပူလာတာနဲ့ ကြက်သွန်ဖြူနှင့် ကြက်သွန်နီကို ထည့်ကြော်ပါ
- ကြက်သွန်များ နွမ်းတာနဲ့ ပဲသီးများကို ထည့်ကြော်ပါ
- ပဲသီးများ ထည့်ပြီးတာနဲ့ ဆားနှင့် ဟင်းခတ်မှုန့်တို့ကို ထည့်ပြီး မွှေပေးပါ
- ပဲသီးများ အနည်းငယ် နွမ်းလာတာနဲ့ ပုဇွန်ခြောက်ကို ရေစစ်ကာ ထည့်မွှေပေးပါ
- ပြီးတာနဲ့ အရသာမြည်းကာ လိုသလိုပြင်ပြီး ပဲသီးကြော် ချိုစိမ့်စိမ့်လေးကို စားသုံးနိူင်ပါပြီ။
No comments:
Post a Comment