Tuesday 18 February 2020

က ကတစ်ငါး ရေချိုဟင်း


က ကတစ်ငါး တစ်ကောင် ဝယ်လာပြီး အလယ်ပိုင်းလေးတွေကို ပေါင်းပါမယ် ငါးပါးဟက်ရဲ့ အောက်သား နှစ်တုံးကိုတော့ အရည်သောက်ဆမ်း ရေချိုဟင်းလေး ချက်ထားပါတယ်။

ထမင်းနဲ့ စားတဲ့အခါ အရည်လေးဘဲ ဆမ်းစားစား အရည်သောက်လေးဘဲ လုပ်လုပ် စားမြိန်ဟင်းလေး တစ်မယ် ရလာမှာမို့လို့ မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေပေးလိုက်ပါတယ်ရှင်။

ပါ၀င်ပစ္စည်းများ

က ကတစ်ငါး - 200 g
ကြက်သွန်နီ - အနေတော် တစ်လုံး
ကြက်သွန်ဖြူ  - အမွှာကြီးကြီး နှစ်မွှာ
ချင်း - ခပ်ပါးပါး နှစ်ပြား
ငရုတ်သီး အရောင်တင်မှုန့် - လက်ဖက်ရည်ဇွန်း တစ်ဝက်
နံနံပင် - အပင်ကြီးကြီး နှစ်ပင်
ဆား - လက်ဖက်ရည်ဇွန်း တစ်ဇွန်း
ငါးငံပြာရည် - ထမင်းစားဇွန်း တစ်ဇွန်း
နနွင်းမှုန့် - လက်ဖက်ရည်ဇွန်း သုံးပုံတစ်ပုံ (ငါးအရသာနယ်ရန်)
နနွင်းမှုန့် - လက်ဖက်ရည်ဇွန်း သုံးပုံတစ်ပုံ (ငါးဆီသတ်ရန်)
အရသာမှုန့် - လက်ဖက်ရည်ဇွန်း တစ်ဇွန်း
ဆီ - ထမင်းစားဇွန်း ၃ဇွန်း

ပြင်ဆင်ပုံ
က ကတစ်ငါးကို အကြေးခွံထိုးကာ ဗိုက်ထဲမှ မလိုတာတွေဖယ်ပြီး ဆူးတောင်များ ခုတ်ပေးပါ
အကောင်လိုက် ရေဆေးပြီး လက်၃လုံးလောက်လေးတွေ တုံးထားပါ
တုံးထားသောငါးကို ရေတစ်ထပ်ဆေးပေးပါ
ပြီးတာနဲ့ ဆား လက်ဖက်ရည်ဇွန်း တစ်ဝက် နနွင်းမှုန့် လက်ဖက်ရည်ဇွန်း လေးပုံတစ်ပုံ အရသာမှုန့် လက်ဖက်ရည်ဇွန်း တစ်၀က်တို့နှင့် အရသာဝင်အောင် နယ်ပေးပြီး ၁၅မိနစ်လောက် နှပ်ထားပါ
ကြက်သွန်နီ ကြက်သွန်ဖြူနှင့် ချင်းတို့ကို အခွံခွာပြီး ရေဆေးကာ ငရုတ်သီး အရောင်တင်မှုန့်နှင့် ညက်နေအောင် ထောင်းထားပါ
နံနံပင်ကို ရေဆေးပြီး အနေတော် ပိုင်းဖြတ်ထားပါ
အားလုံးအဆင်သင့် ဖြစ်တာနဲ့ အိုးထဲမှာ ဆီနှင့်နနွင်းမှုန့်ထဲ့ကာ အပူပေးပါ
ဆီပူလာတာနဲ့ ငရုတ်သီးထောင်းကို ထဲ့ပေးပြီး ဆီသတ်ပေးပါ 
ဆီသတ်နံ့လေး သင်းလာတာနဲ့ အရသာ နယ်ထားတဲ့ငါးကို ထည့်မွှေပေးပါ
ငါးအသားများမာပြီး အရောင်ပြောင်းလာတာနဲ့ ရေမြုပ်အောင်ထဲ့ပြီး ပွက်ပွက်ဆူအောင် တည်ပေးပါ
ရေပွက်ပွက်ဆူပြီး ၅မိနစ်လောက်နေရင် အရသာမြည်းပေးပါ
ပြီးတာနဲ့ ငံပြာရည်ကို ထဲ့ပေးပြီး အရသာကို မိမိစိတ်ကြိုက် ပြင်ပေးပါ
အရသာ ပြင်ပြီးတာနဲ့ ခနလောက် ပေးဆူထားပြီးတာနဲ့ နံနံပင် အုပ်ပေးပြီး မီးပိတ်ပေးပါ
ပြီးတာနဲ့ က ကတစ်ငါး ငါးရေချို အရည်သောက်ဆမ်း ဟင်းရည်ကို စားသုံးရန် ပြင်ပေးနိူင်ပါပြီ။

No comments:

Post a Comment