မာမာ ဒီနေ့တော့ ပဲနီလေးကို အရည်သောက် မချက်တော့ဘဲ ထမင်းပူပူလေးနဲ့ စားရလေအောင် ပဲပေါင်းစိမ့်စိမ့်လေး ချက်ဖြစ်ပါတယ်။
ဒါကြောင့်မို့လို့ မာမာပြင်ဆင်ပြီး ချက်ထားတဲ့ ပဲနီလေး ပဲပေါင်း ချက်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ပဲနီလေး - ထမင်းပေါင်းအိုး ဆန်ချင်ဗူး နှစ်ဗူးခွဲ
- ကြက်သွန်နီ - အလုံးကြီးကြီး နှစ်လုံး
- ဆီ - ထမင်းစားဇွန်း တဆယ်ငါးဇွန်း
- နနွင်းမှုန့် - လက်ဖက်ရည်ဇွန်း တစ်၀က်သာသာ (ဆီချက်ချက်ရန်နှင့် ပဲပြုပ်ထဲထည့်ရန်)
- ဆား - လက်ဖက်ရည်ဇွန်း တစ်၀က်သာသာ
- အရသာမှုန့် - လက်ဖက်ရည်ဇွန်း တစ်ဝက်
ပြင်ဆင်ပုံ
- ပဲကို ရေ ၂ထပ်လောက် ဆေးပြီး ပဲအထက်ရေ လက်ငါးလုံးလောက် မြုပ်အောင်ထည့်ပေးပါ
- ရေမြုပ်အောင် ထည့်ထားသော အိုးထဲသို့ နနွင်းမှုန့်ထည့်ကာ ပြုပ်ပေးပါ
- ပဲပြုပ်နေစဉ် ဝေကျတတ်သောကြောင့် အဖုံးမဖုံးဘဲ အိုးပေါ်မှာ သစ်သားယောင်းမ ကန့်လန့်ဖြတ်တင်ကာ ပြုပ်ပေးပါ
- ပထမတစ်ရည် ခမ်းကာနီး ပဲများမနူးသေးလျှင် ရေကို ပထမဆုံး ထည့်သလိုဘဲထည့်ပြီး ပြုပ်ပေးပါ
- ပဲများနူးလာပြီး ရေခမ်းလာပြီဆိုရင် ယောင်းမဖြင့် သမအောင် မွှေပေးပါ
- ပဲများနူးပါက မီးပိတ်ပြီး အအေးခံထားပါ
- ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးထားပါ
- ဆီကို အပူပေးပြီး ဆီပူလာပါက နနွင်းမှုန့် အနည်းငယ် ထည့်ပေးပါ
- ဆီအငွေ့တက်လာတာနဲ့ ကြက်သွန်နီကို ရွှေဝါရောင် သန်းလာတဲ့ထိ ကြော်ပြီး ဆီစစ်ထားပါ
- ကြက်သွန်ကြော်ထားသော ဆီထဲမှာ ပဲကို တစ်မိနစ်လောက် ထည့်ကြော်ပေးပါ
- ပြီးထာနဲ့ ပန်းကန်ထဲ ပြောင်းထည့်ကာ ကြော်ပြီဆီစစ်ထားသော ကြက်သွန်ကြော် ဖြူးပြီး ပဲနီလေး ပဲပေါင်း စိမ့်စိမ့်လေးကို စားသုံးနိူင်ပါပြီ။
ပဲနီလေးကို ဒါမျိုးလေးလည်း လုပ်စားလို့ရတာကို ခုမှသိတယ် ကျေးဇူးပါ တီတီ
ReplyDeleteပဲနီလေးက လုပ်ရတာ ပိုပြီးလွယ်တယ်နော်။
Delete