အခုရက်ထဲ အသီးအရွက်ဈေးကို သွားလေတိုင်း မုံလာဥတွေ တွေ့တွေ့နေရတော့ အော်ကွေ့ကြည်လေး လုပ်စားချင်က ပေါ်လာခဲ့ပြန်ပါတယ်။
ဒါကြောင့်မို့လို့ ဒီနေ့တော့ မနေ့က လုပ်စားဖြစ်တဲ့ မုံလာဥ အော်ကွေ့ကြည် လုပ်နည်းလေးကို မျှဝေပေးမှာ ဖြစ်ပါတယ်ရှင်။
ပါဝင်ပစ္စည်းများ
- မုံလာဥဖြူ - တစ်လက်မခန့် ခြောက်တုံး
- ကော်မှုန့် - ထမင်းစားဇွန်း သုံးဇွန်း
- ဆန်စိမ်းမှုန့် - နှစ်ဗူး (ထမင်းပေါင်းအိုး ဆန်ချင်ဗူး)
- ရေ - ထမင်းစားဇွန်း ဆယ်ဇွန်းခန့် (မုံလာဥကြိတ်ရန်)
- ပုဇွန်ခြောက်မှုန့် - ထမင်းစားဇွန်း သုံးဇွန်း
- အရသာမှုန့် - လက်ဖက်ရည်ဇွန်း တစ်ဇွန်း
- ဆီ - လိုသလောက် သုံးပေးပါ
- ရေ - လိုသလောက် သုံးပေးပါ
ပြင်ဆင်ပြုလုပ်ပုံ
- မုံလာဥဖြူကို အခွံခွာပြီး ရေဆေးကာ အနေတော် အတုံးလေးတွေ တုံးပေးပါ
- ဇောက်နက်သော အိုးတစ်လုံးထဲမှာ မုံလာဥများထည့်ပြီး မုံလာဥများ မြုပ်လောက်တဲ့အထိ ရေထည့်ပေးပါ
- ပြီးတာနဲ့ မုံလာဥများ နူးလာအောင် ပြုပ်ပေးပါ
- မုံလာဥများ နူးလာတာနဲ့ မုံလာဥများကို ဆယ်ပေးကာ ဘလင်ဒါထဲ ထည့်ပေးပါ
- ကြိတ်လို့ လွယ်ကူစေရန် ရေကိုထည့်ပြီး ညက်နေအောင် ကြိတ်ပေးပါ
- ဇလုံတစ်လုံးထဲမှာ ပုဇွန်ခြောက်မှုန့် ကြိတ်ထားသော မုံလာဥ အရသာမှုန့် ဆန်မှုန့် ကော်မှုန့်နှင့် ရေအနည်းငယ် တို့ကိုထည့်ပြီး သမအောင် မွှေပေးပါ
- မံလာဥ မုန့်နှစ် အရမ်းကျဲကျဲကြီး မဖြစ်စေရန် ရေကိုချင့်ချိန်ပြီး ထည့်ပေးပါ
- မုန့်ပေါင်းမည့် ခွက်ကို ဆီခပ်များများနဲ့ ရွှဲနေအောင် သုတ်ထားပါ
- အားလုံးအဆင်သင့် ဖြစ်တာနဲ့ ဆီသုတ်ထားသော ခွက်ထဲမှာ မုံလာဥ မုန့်နှစ်များကို ထည့်ပေးပါ
- မုန့်ပေါင်းမည့် ပေါင်းအိုးအောက်ခံအိုးထဲမှာ ရေတစ်ဝက်လောက် ထည့်ပေးပါ
- ထိုရေထဲမှာ ပေါင်းခံဇကာကို ထည့်ပေးကာ ထိုဇကာ အပေါ်မှာ မုန့်နှစ်ထည့်ထားသော ခွက်ကိုထည့်ပေးပါ
- ပြီးတာနဲ့ အိုးအဖုံးအုပ်ကာ မီးအနေတော်နှင့် လေးဆယ့်ငါးမိနစ်လောက် ပေါင်းပေးပါ
- မုန့်သားပေါင်းချိန် ပြည့်တာနဲ့ အိုးထဲမှ ထုတ်ကာ အအေးခံပေးပါ
- မုန့်သားက ပေါင်းပြီးသား ဖြစ်တဲ့အတွက် အနေတော်လေးတွေ လှီးပေးကာ အရသာ စပ်ထားသော အချဉ်ရည်နှင့် ဒီအတိုင်းလဲ စားသုံးနိူင်သလို မိမိနှစ်သက်တဲ့ ပုံစံလေးတွေလှီးပြီး ဒယ်အိုးထဲမှာ ဆီထည့်ကာ ကြော်စားနိူင်ပါသေးတယ်။
အော်ကွေ့ကြည်နှင့်စားရန် အချဉ်စပ်ရန် ပါဝင်ပစ္စည်းများ
- မိမိနှစ်သက်ရာ ငရုတ်ဆီ - ထမင်းစားဇွန်း လေးဇွန်း
- နံနံပင် - မိမိနှစ်သက်သလောက်
- ငရုတ်သီးစိမ်း - မိမိနှစ်သက်သလောက်
- ကြက်သွန်ဖြူ - အမွှာသေး ဆယ်မွှာခန့်
- အရသာမှုန့် - လက်ဖက်ရည်ဇွန်း တစ်ဇွန်း
- ငါးငံပြာရည် - ထမင်းစားဇွန်း သုံးဇွန်း
- ရေကျက်အေး - ထမင်းစားဇွန်း သုံးဇွန်း
အချဉ်စပ်ပုံ
- နံနံပင်ကို ရေဆေးပြီး မထူမပါးလေးတွေ လှီးထားပါ
- ငရုတ်သီးစိမ်းကို ရေဆေးပြီး ခပ်ပါးပါးလေးတွေ လှီးထားပါ
- ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ပြီး ခပ်နုတ်နုတ်လေးတွေ လှီးထားပါ
- အားလုံး အဆင်သင့် ဖြစ်တာနဲ့ ဇလုံတစ်လုံးထဲမှာ ပါဝင်ပစ္စည်းများကို ထည့်ပေးပြီး သမအောင် မွှေပေးပါ
- အရသာ သမသွားတာနဲ့ အရသာ မြည်းပေးကာ မိမိနှစ်သက်တဲ့ အရသာ ရလာအောင် ပြင်ပေးပါ ။
No comments:
Post a Comment