ဒီနေ့တော့ မာမာတစ်ယောက် ဈေးသွားရင်းက က ကတစ်ငါးတစ်ကောင် ဝယ်လာခဲ့တာနဲ့ ငါးကြော်ကြွတ်ကြွတ်လေး ကြော်ကာ ကြော်နှပ်လေး ချက်ဖြစ်ပါတယ်။
ဒါကြောင့်မို့လို့ ငါးကြော်ကို ဒီအတိုင်း စားမဲ့အစား ငါးကြော်နှပ် မွှေးမွှေးလေးနဲ့ စားရတာ အရသာ ပိုပြီးကောင်းစေတဲ့အတွက် မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- က ကတစ် - တစ်ကောင်
- နနွင်းမှုန့် - လက်ဖက်ရည်ဇွန်း တစ်ဝက် (ငါးအရသာနယ်ရန်)
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ (ငါးကြော်မည့်ဆီထဲထည့်ရန်)
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ (ကြက်သွန်ကြော်မည့်အထဲထည့်ရန်)
- ဆား - လက်ဖက်ရည်ဇွန်း တစ်ဝက်
- အရသာမှုန့် - လက်ဖက်ရည်ဇွန်း တစ်ဇွန်း
- ချင်းမှုန့် - လက်ဖက်ရည်ဇွန်း သုံးပုံတစ်ပုံ
- ကြက်သွန်ဖြူမှုန့် - လက်ဖက်ရည်ဇွန်း သုံးပုံတစ်ပုံ
- ကြက်သွန်နီ - ခပ်ကြီးကြီး တစ်လုံး
- ကြက်သွန်ဖြူ - ခပ်ကြီးကြီး ငါးမွှာ
- ချင်းတက် - လက်တဆစ်ခန့်
- ဆီ - လိုသလောက် သုံးပေးပါ
ပြင်ဆင်ချက်ပြုပ်ပုံ
- အရင်ဆုံး ငါးကိုမလိုတာတွေဖယ်ပြီး သန့်ရှင်းပေးကာ ရေစင်အောင် ဆေးပေးပါ
- ငါးကိုရေဆေးပြီးတာနဲ့ ငါးကို အနေတော် အတုံးလေးတွေ တုံးပေးပါ
- ဇလုံထဲမှာ ငါး နနွင်းမှုန့် ဆား အရသာမှုန့် ချင်းမှုန့် ကြက်သွန်ဖြူမှုန့်တို့ထည့်ကာ အရသာဝင်အောင် နယ်ပေးပါ
- ဒယ်အိုးကြီးကြီးထဲမှာ ဆီခပ်များများလေး ထည့်ပြီး အပူပေးပါ
- ဆီပူလာတာနဲ့ နနွင်းမှုန့်ထည့်ပေးကာ အရသာ နယ်ထားသောငါးကို အိုးဆန့်သလောက် ထည့်ပေးပါ
- ငါးထည့်ပြီးတာနဲ့ မီးကိုအနေတေ် လျှော့ပေးပြီးမှ ကြော်ပေးပါ
- ကြော်ထားသော ငါးတုံးများ တစ်ဖက်ကျက်မှ တစ်ဖက်ကို လှန်ပေးပြီး ကြော်ပေးပါ
- နှစ်ဖက်လုံး ကျက်ပါက ဆယ်ပြီးဆီစစ်ပေးထားပါ
- ဆီစစ်ထားသော ငါးကြော်ကို ပန်းကန်ပြားထဲမှာ ထည့်ပေးပါ
ငါးကြော်နှပ်နည်း
- ကြက်သွန်နီ ကြက်သွန်ဖြူနှင့် ချင်းတို့ကို အခွံခွာပြီး ရေဆေးပေးပါ
- ပြီးတာနဲ့ ကြက်သန်နီ ချင်းနှင့် ကြက်သွန်ဖြူတို့ကို ခပ်ပါးပါးလေးတွေ လှီးပေးပါ
- ဒယ်အိုးထဲမှာ ဆီနှင့် နနွင်းမှုန့်ထည့်ပြီး အပူပေးပါ
- ဆီပူလာတာနဲ့ လှီးထားသော ချင်း ကြက်သွန်နီနှင့် ကြက်သွန်ဖြူကို ထည့်ကြော်ပေးပါ
- ကြက်သွန်များ ကြော်နေစဉ် အကျက်ညီစေရန် မကြာမကြာ မွှေပေးပါ
- ကြက်သွန်များ အိလာတာနဲ့ ပဲငံပြာရည်အကြည်နှင့် ပဲငံပြာရည် အနောက်တို့ကို ထည့်မွှေပေးပါ
- အရသာ သမသွားတာနဲ့ ကြော်ထားသော ငါးကြော်များကို ထည့်မွှေပေးပြီးတာနဲ့ ငါးကြော်နှပ် မွှေးမွှေးလေး ရပါပြီ။
No comments:
Post a Comment