မာမာ ဒီနေ့တော့ အိမ်မှာ ပေါင်းစားဖြစ်တဲ့ ဝက်သားပေါင်း ပေါင်းနည်းကို မျှဝေပါမယ်ရှင်။
ပါဝင်ပစ္စည်းများ
- ဝက်သား - သုံးဆယ်သား
- ဆီ - ထမင်းစားဇွန်း တစ်ဇွန်းခွဲ
- ပြောင်းကော်မှုန့် - ထမင်းစားဇွန်း သုံးဇွန်းသာသာ
- ဆား - လက်ဖက်ရည်ဇွန်းတဝက်
- အရသာမှုန့် - လက်ဖက်ရည်ဇွန်း တဝက်သာသာ
- နနွင်းမှုန့် - လက်ဖက်ရည်ဇွန်း သုံးပုံတပုံ
- ငရုတ် ကောင်းမှုန့် - လက်ဖက်ရည်ဇွန်း ငါးပုံတပုံ
- ကြက်သွန်ဖြူ - အမွှာကြီးကြီး လေးမွှာ
- ကြက်သွန်နီ - အနေတော် တလုံး
- ချင်းတက် - ခပ်ပါးပါးသုံးပြား
- ကြက်သွန်မြိတ် - အပင်ကြီးကြီး နှစ်ပင်
- မုံလာဥနီ - အနေတော် တဥ
- ကြက်ဥ - တလုံး
- နှမ်းဆီ - အနည်းငယ်
ပြင်ဆင်ပြုလုပ်ပုံ
- ဝက်သားကို ရေဆေးပြီး ရေစစ်ကာ ခပ်နုတ်နုတ် စင်းထားပါ
- ကြက်သွန်ဖြူ ကြက်သွန်နီ ချင်းနှင့် မုံလာဥနီတို့ကို အခွံခွာပြီး ရေဆေးကာ ခပ်နုတ်နုတ် လှီးထားပါ
- ကြက်သွန်မြိတ်ကိုလဲ ရေဆေးကာ ခပ်ပါးပါးလှီးထားပါ
- အားလုံးအဆင်သင့် ဖြစ်တာနဲ့ ဇလုံထဲမှာ ဝက်သား ကြက်သွန်ဖြူ ကြက်သွန်နီ ချင်း မုံလာဥနီ နှမ်းဆီ ငရုတ်ကောင်းမှုန့် ဆီ ဆား အရသာမှုန့် ပြောင်းကော်မှုန့် ကြက်ဥ နနွင်းမှုန့်နှင့် ကြက်သွန်မြိတ် တဝက်တို့ကို ထည့်ပြီး နယ်ပေးပါ
- အရသာ သမသွားတာနဲ့ ပေါင်းမဲ့ ပန်းကန်ထဲကို ထည့်ပေးပါ
- မာမာက pressure cooker နဲ့ ပေါင်းမှာဖြစ်တဲ့အတွက် ပေါင်းအိုးထဲကို အောက်ခံခုံထိတဲ့အထိ ရေထည့်ပါတယ်
- ပြီးတော့မှ ပေါင်းဇကာထဲကို ဝက်သားပန်းကန်ထည့်ပါတယ်
- ပေါင်းအိုးထဲကို ဝက်သားပန်းကန် ထည့်ပြီးတာနဲ့ အဖုံးကို လေလုံအောင်ပိတ်ကာ မိနစ်၂၀ ခလုတ်ကို နှိပ်ပြီး ပေါင်းပါတယ်။
- ပေါင်းထားတာ မိနစ်၂၀ပြည့်ပြီဆိုရင်တာ့ အိုးထဲမှ လေကုန်အောင်ထုတ်ပြီး အိုးအဖုံးကို ဖွင့်ပေးပါ
- ပြီးတာနဲ့ ပေါင်းထားတဲ့ ဝက်သားပေါင်း ပန်းကန်ကို အပြင်ထုတ်ပြီး ချန်ထားတဲ့ ကြက်သွန်မြိတ်လေးဖြူးကာ စားသုံးနိုင်ပါပြီရှင်။
No comments:
Post a Comment