ငပိရည် ကျိုနည်းလေးတွေ အမျိုးမျိုး ရှိကြပါတယ် မာမာကတော့ ငပိရည် ကျိုတဲ့အခါ နနွင်းမှုန့် ထည့်ကျိုတာကလွဲပြီး တစ်ခြား အမွှေးအကြိုင်တွေ ထည့်ကျိုတာ မကြိုက်ပါဘူး။
ဒါကြောင့်မို့လို့ မာမာ့လို ငပိရည် ကြိုက်ကြတဲ့သူတွေ ရှိကြတဲ့အတွက် ငါးပိရည် ကျိုနည်းလေး လာလာပြီး မေးတတ်ကြလွန်းလို့ မာမာကျိုထားတဲ့ နည်းလေးနဲ့ ငပိရည် ဖျော်စရာ လုပ်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
ငါးပိရည်ကျိုရန်
- ငါးပိရည်ကျိုရန် ငါးငပိ - နှစ်ဆယ်သား (ငါးရံ့ငါးပိကို သုံးထားပါတယ်)
- ဆား - လက်ဖက်ရည်ဇွန်း နှစ်ဇွန်း
- နနွင်းမှုန့် - လက်ဖက်ရည်ဇွန်း တစ်၀က်မရှိတစ်ရှိ
- ရေ - ထမင်းပေါင်းအိုး ဆန်ချင်ဗူး ၄ဗူးခွဲသာသာတို့ကို ဇောက်နက်သော အိုးတစ်လုံးထဲ ငါးပိနှင့် အတူတူထည့်ပေးပြီး ဆယ်မိနစ်လောက် ပွက်ပွက်ဆူအောင် တည်ပေးပါ
- ငါးပိရည် ရပါက အရိုးများစစ်ကာ ငါးပိရည်ကို ပန်းကန်လုံး တစ်လုံးထဲသို့ ပြောင်းထည့်ထားပါ။
ဖျော်စရာထောင်းရန် ပါ၀င်ပစ္စည်းများ
- ရွှေလံဘို ငရုတ်သီးစိမ်း - မိမိနှစ်သက်သလောက်
- ငါးကင် - တစ်ကောင် (မိမိနှစ်သက်ရာကိုသုံးပေးပါ)
- ကြက်သွန်ဖြူ - အမွှာကြီးကြီး ၁၁မွှာ
- ကြက်သွန်နီ - အနေတော် သုံးလုံး
- ငရုတ်သီး အလှော်မှုန့် - မိမိနှစ်သက်သလောက်
- အရသာမှုန့် - လက်ဖက်ရည်ဇွန်း တစ်ဇွန်းသာသာ
ပြင်ဆင်ပုံ
- ငပိရည်ကျိုပြီးသားကို အရိုးစစ်ပြီး ငပိရည်ကို ယူထားပါ
- ငါးကင်တစ်ကောင်ကို အရိုးထွင်ကာ အသားကို ယူထားပါ
- ကြက်သွန်ဖြူကို အခွံခွာပြီး ရေဆေးကာ အိုးအသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာတဲ့အထိ ထည့်လှော်ပေးပါ
- ကြက်သွန်နီကိုလဲ အခွံခွာပြီး ရေဆေးကာ အိုးအသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာတဲ့အထိ ထည့်လှော်ပေးပါ
- ပြီးတာနဲ့ ကြက်သွန်နီနှင့် ကြက်သွန်ဖြူတို့ကို ငရုတ်ဆုံထဲထည့်ပြီး မညက်တစ်ညက်လေး ထောင်းပေးပါ
- ရွှေလံဘို ငရုတ်သီးစိမ်းကိုလဲ အညှာခြွေပြီး ရေဆေးထားပါ
- အားလုံးအဆင်သင့် ဖြစ်ပါက ငါးပိရည် ပန်းကန်ထဲမှာ ပါ၀င်ပစ္စည်းများကို ရောထည့်ကာ အားလုံးသမသွားအောင် ရောဖျော်ပေးပါ
- ငါးပိရည်အဖျော် ရတာနဲ့ တစ်ခါစားစာ ချန်ထားပြီး ပိုနေသော ငါးပိရည်ဖျော်များကို လေလုံဗူးများနှင့်ထည့်ကာ ရေခဲသေတ္တာ ခဲတဲ့အကန့်ထဲမှာ ထည့်ပြီးသိမ်းထားပါ
- ငါးပိရည် အဖျော်မွှေးမွှေး စပ်စပ်လေးနဲ့ အရသာရှိလှတဲ့ ငါးပိရည်ဖျော်လေးကို တို့စရာအစုံနှင့် မြိန်ယှက်စွာ စားသုံးနိုင်ပါပြီ။
