ြမန်မာလူမျိုးတို့ ခံတွင်းက လူဆယ်ယောက်မှာ ကိုးယောက်လောက်က ငါးပိရည်ကို ကြိုက်ကြပါတယ် မာမာဆိုလဲ ငါးပိရည် မပါရင် ထမင်းမစားတတ်တာမို့လို့ နေ့တိုင်းလိုလို ထမင်းဝိုင်းမှာ ငါးပိရည် တို့စရာလေးတော့ ပါတတ်ပါတယ်။
ငါးပိရည်ကို အဖျော်လုပ်တဲ့အခါ ငါးကင် ငါးပြုပ် ပုဇွန်ခြောက်ထောင်းတို့ကို မိမိနှစ်သက်ရာ ငရုတ်သီးစိမ်းတို့ ငရုတ်သီး အလှော်မှုန့်တို့ ကြက်သွန်ဖြူ ကြက်သွန်နီ ခရမ်းချဉ်သီးတို့နဲ့ အဆင်ပြေသလို အဖျော် လုပ်တတ်ကြပါတယ်။
မာမာကတော့ ဒီနေ့ငါးခူကို မီးကင်ပြီး ငါးပိရည်ကျို အဖျော်လေး လုပ်ထားပါတယ် ဒါကြောင့်မို့လို့ မာမာပြင်ဆင်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ငါးပိရည်ကျိုရန် ငါးငပိ - နှစ်ဆယ်သား
- ဆား - လက်ဖက်ရည်ဇွန်း နှစ်ဇွန်း
- နနွင်းမှုန့် - လက်ဖက်ရည်ဇွန်း တစ်၀က်မရှိတစ်ရှိ
- ရေ - လက်ဖက်ရည် အကြမ်းပန်းကန် ၄လုံးခွဲသာသာတို့ကို ဇောက်နက်သော အိုးတစ်လုံးထဲ ထည့်ပေးပြီး ဆယ်မိနစ်လောက် ပွက်ပွက်ဆူအောင် တည်ပေးပါ
- ငါးပိရည် ရပါက အရိုးများစစ်ကာ ငါးပိရည်ကို ပန်းကန်တစ်လုံးထဲသို့ ပြောင်းထည့်ထားပါ။
ဖျော်စရာထောင်းရန် လိုအပ်သော ပါ၀င်ပစ္စည်းများ
- ငါးခူ - အကောင်ကြီးကြီး တစ်ကောင်
- ငရုတ်သီးစိမ်း - မိမိနှစ်သက်သလောက်
- ကြက်သွန်ဖြူ - အမွှာကြီးကြီး ၁၅မွှာ
- ကြက်သွန်နီ - အနေတော် လေးလုံး
- ငရုတ်သီး အလှော်မှုန့် - စားနိူင်သလောက်
- အရသာမှုန့် - လက်ဖက်ရည်ဇွန်း တစ်ဇွန်းသာသာ
ပြင်ဆင်ပုံ
- ကြက်သွန်ဖြူကို အမွှာလေးတွေ ထွင်ပေးပြီး အသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ ထည့်လှော်ပေးပါ
- ကြက်သွန်နီကို အသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ ထည့်ဖုတ်ပေးပါ
- ပြီးတာနဲ့ ရေဆေးပြီး အခွံများ ခွာပေးထားပါ
- ငါးကို မလိုတာတွေ ဖယ်ပြီး ရေစင်အောင်ဆေးကာ ဘေးနှစ်ဖက်ကို ခပ်စိတ်စိတ်လေး မွှန်းပေးပါ
- ပြီးတာနဲ့ အကျက်ညီစေရန် ငါးကို ဒုတ်နဲ့ထိုးပြီး မီးသွေးမီးဖိုရှိပါက ကျက်သွားအောင် ကင်ပေးပါ သို့မဟုတ်
- အသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ ထည့်ကင်ပေးပါ
- ပြီးတာနဲ့ ငါးကင်ကို အရိုးအသား သပ်သပ်စီ နွှင်ထားပေးပါ
- ငရုတ်သီးစိမ်းကိုလဲ ရေဆေးကာ အသားထူသော ဒယ်အိုးထဲမှာ အပေါ်ယံ ကျွမ်းယောင်သန်းလာထိ ထည့်လှော်ပေးပါ
- ပြီးတာနဲ့ မညက်တညက် ထောင်းပေးထားပါ
- အားလုံးအဆင်သင့်ဖြစ်တာနဲ့ ငါးကင် ငရုတ်သီးစိမ်း ငရုတ်သီး အလှော်မှုန့် အရသာမှုန့် ကြက်သွန်နီနှင့် ကြက်သွန်ဖြူတို့ကို ငရုတ်ဆုံထဲထည့်ပြီး မညက်တစ်ညက် ကြိတ်ပေးပါ
- ထောင်းပြီးပါက ငါးပိရည် ပန်းကန်ထဲ ရောထည့်ကာ အားလုံးသမသွားအောင် ရောဖျော်ပေးပါ
- တစ်ခါစားစာ ချန်ထားပြီး ပိုနေသော ငါးပိရည်ဖျော်များကို လေလုံဗူးများနှင့်ထည့်ကာ ရေခဲသေတ္တာ ခဲတဲ့အကန့်ထဲမှာ ထည့်ပြိးသိမ်းထားပါ
- ငါးပိရည်အဖျော်မွှေးမွှေး စပ်စပ်လေးနဲ့ အရသာရှိလှတဲ့ ငါးပိရည်ဖျော်လေးကို တို့စရာအစုံနှင့် မိန်ယှက်စွာ စားသုံးနိုင်ပါပြီ။
