Monday 30 May 2022

ကြက်ကြိတ်သား အစာသွပ်






ဒီနေ့တော့ ဘုံလုံသီးကို ကြက်သားနဲ့ အစာသွတ်လေး ချက်ပါမယ် မဆိုသလောက်လေး လက်ဝင်ပေမဲ့ စားလို့အရမ်းကောင်းတဲ့အတွက် မာမာပြင်ဆင်ပြီး ချက်ထားတဲ့ ချက်နည်းလေးကို မျှဝေလိုက်ပါတယ်ရှင်။

ပါ၀င်ပစ္စည်းများ
  1. ဘုံလုံသီး - နှစ်တောင့် 
  2. ကြက်ကြိတ်သား - 250 g
  3. ကြက်သွန်နီ - ဥကြီးကြီး တစ်လုံး
  4. ကြက်သွန်နီ - အနေတော် တစ်ဥ (ဆီသတ်ရန် အနည်းငယ် ချန်ထားပါ)
  5. ချင်း - လက်တစ်ဆစ်သာသာ
  6. ကြက်သွန်ဖြူ - အမွှာကြီးကြီး ၄မွှာ (ဆီသတ်ရန် တစ်၀က်ချန်ထားပါ )
  7. ကြက်ဥ - တစ်လုံး
  8. ဆား - လက်ဖက်ရည်ဇွန်း တစ်ဇွန်း (တစ်၀က်ကို အစာထဲ ထည့်ပေးပါ)
  9. အချိုမှုန့် - လက်ဖက်ရည်ဇွန်း တစ်ဇွန်း (တစ်၀က်ကို အစာထဲ ထည့်ပေးပါ)
  10. နနွင်းမှုန့် - လက်ဖက်ရည်ဇွန်း တစ်၀က် (ဆီသတ်ရန် တ၀က်ချန်ထားပါ )
  11. ငရုတ်သီး အရောင်တင်မှုန့် - လက်ဖက်ရည်ဇွန်း တစ်ဇွန်းသာသာ
  12. ဆီ - ထမင်းစားဇွန်း ၈ဇွန်းသာသာ 
  13. ပဲဆီ - ထမင်းစားဇွန်း တစ်ဇွန်းခွဲ

ပြင်ဆင်ပုံ
  • ဘုံလုံသီးကို အတောင့်လိုက်ကိုင်ကာ အပေါ်ယံ အမှေးအဖြူရောင်များ ကုန်သွားအောင် ဓါးနှင့် ခြစ်ပေးပါ
  • နှစ်တောင့်လုံး အမှေးပါးများ ခြစ်ပြီးတာနဲ့ အတောင့်လိုက် ရေဆေးပြီး ပုံပါအတိုင်း မိမိနှစ်သက်သလောက် အရှည်အနေအထား ရအောင် လှီးပေးပါ 
  • လှီးထားသော ဘုံလုံသီးအထဲမှ အစေ့များကို တစ်ဖက်ပိတ်ချန်ပြီး တစ်ဖက်မှ အရိုးရှည်သော ဇွန်းဖင်နှင့် ကလော်ထုတ်ပေးပါ
  • ကလော်ထုတ်ထားသော ဘုံလုံစေ့များနှင့် အမျှင်များကို အစေ့အရမ်း မရင့်ပါက ဓါးနှင့်နုတ်နုတ် စဉ်းပေးထားပါ
  • ကြက်သွန်နီကို အခွံခွာပြီး ရေဆေးကာ ခပ်နုပ်နုပ် လှီးထားပါ
  • ကြက်ကြိတ်သားကို ဇလုံထဲထည့်ကာ ပဲဆီ ကြက်ဥ ငရုတ်သီး အရောင်တင်မှုန့် လက်ဖက်ရည်ဇွန်း တဝက် ဆား နနွင်းမှုန့် နုတ်နုတ်စဉ်းထားသော ဘုံလုံစေ့များနှင့် အချိုမှုန့်တို့ထည့်ကာ နယ်ထားပါ
  • ကြက်သွန်နီ အနေတော်ဥကို အခွံခွာပြီး ရေဆေးကာ ခပ်နုပ်နုပ် လှီးထားပါ
  • ကြက်သွန်ဖြူကို အခွံခွာပြီး ရေဆေးကာ ခပ်နုတ်နုတ် လှီးထားပါ
  • ချင်းကိုအခွံခွာပြီး ရေဆေးထားကာ လှီးထားသော ကြက်သွန်နီ ကြက်သွန်ဖြူနှင့် ငရုတ်သီး အရောင်တင်မှုန့်တို့ထည့်ကာ ညက်နေအောင် ထောင်းပေးပါ
  • အားလုံး အဆင်သင့် ဖြစ်တာနဲ့ ဘုံလုံသီးများကို အစာသွပ်ဖို့ ပြင်ပေးပါ
  • အရသာ နယ်ထားသော အစာကို ဇွန်းလေးတစ်ခုနှင့်ခပ်ပြီး ဘုံလုံသီးထဲကို တစ်ခုခြင်း အစာသွပ်ပေးပါ
  • အစာသွပ်ပြီးလို့ ပိုနေတဲ့ အစာတွေကို ဆီသတ်ရန် ချန်ထားပေးပါ
  • ဘုံလုံသီးများ အစာသွပ်ပြီးပြီဆိုတာနဲ့ ဇောက်နက်သော ဒယ်အိုးကို အပူပေးကာ ဆီနှင့်နနွင်းမှုန့်တို့ကိုထည့်ပါ
  • ဆီပူလာတာနဲ့ ငရုတ်သီးထောင်းကို မွှေးလာအောင် ဆီသတ်ပေးပါ 
  • ဆီသတ်နံ့ မွှေးလာတာနဲ့ ပိုနေသော အစာအသားများကိုထည့်ပြီး ဆီသတ်ပါ
  • ဆီသတ်ထားသော ကြက်သားများ မာလာပါက အစာသွပ်ထားသော ဘုံလုံသီး အစာသွပ်များကို ထည့်ပေးပါ
  • ဘုံလုံသီးများ အိုးမကပ်စေရန် အိုးကိုအသာ လှုပ်လှုပ်ပေးပါ 
  • ပြီးတာနဲ့ အိုးအဖုံး အုပ်ပေးပြီး အသားများ မကပ်စေရန် အိုးကို မကြာမကြာ လှုပ်ပေးပါ
  • ပြီးတာနဲ့ ဘုံလုံသီးများ မမြုပ်တစ်မြုပ် ရေထည့်ပေးကာ အဖုံးအုပ်ပြီး တည်ပေးပါ
  • ရေပွက်ပွက် ဆူလာပါက ဆားနှင့် အချိုမှုန့်ထည့်ပြီး မွှေပေးကာ အရသာ မြည်းပေးပါ
  • အရသာ အနေတော် ဖြစ်ပြီဆို   အထက်အောက် အသာလှန်ပေးပြီး ရေကိုမိမိနှစ်သက်သလောက်ထားပြီး မီးပိတ်ပေးပါ
  • ဘုံလုံသီး ကြက်သား အစာသွပ် မွှေးမွှေးလေးကို စားပွဲပြင်ပေးကာ သုံးဆောင်နိူင်ပါပြီ။

No comments:

Post a Comment