ဒီနေ့တော့ စားလို့ အရမ်းကောင်းလွန်းတဲ့ ကြက်တောင်ပံ အကြွတ်ကြော်လေး ကြော်ဖြစ်လို့ မာမာပြင်ဆင်ပြီး ကြော်ထားတဲ့ ကြော်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ကြက်တောင်ပံ - လေးခု
- ကြက်ဥ - တစ်လုံး
- ကြက်သွန်ဖြူ - အမွှာကြီးကြီး လေးမွှာ
- ချင်း - ခပ်ပါးပါး သုံးပြား
- ငရုတ်ကောင်းစေ့ - ဆယ်စေ့ခန့်
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- အရသာမှုန့် - လက်ဖက်ရည်ဇွန်း တစ်၀က်
- ဆား - လက်ဖက်ရည်ဇွန်း သုံးပုံတစ်ပုံ
- သံပုရာရည် - ထမင်းစားဇွန်းတစ်၀က်
- ငရုတ်ကောင်းမှုန့် - လက်ဖက်ရည်ဇွန်း သုံးပုံတစ်ပုံ
- ဆီ - လိုသလောက်
- ဂျုံမှုန့် - ထမင်းစားဇွန်း လေးဇွန်းမောက်မောက်
ပြင်ဆင်ပုံ
- ကြက်တောင်ပံများကို ရေဆေးပြီး ရေခြောက်အောင် Paper Towelနှင့် ခပ်ဖွဖွ သုတ်ပေးပါ
- ချင်းကိုအခွံခွာပြီး ရေဆေးထားပါ
- ကြက်သွန်ဖြူကိုအခွံခွာပြီး ရေဆေးထားပါ
- ချင်း ကြက်သွန်ဖြူနှင့် ငရုတ်ကောင်းစေ့တို့ကို ညက်နေအောင် ထောင်းထားပါ
- ကြက်သားများကို နနွင်းမှုန့် ဆား အရသာမှုန့် သံပုရာရည်တို့နဲ့အရသာ၀င်အောင် ဆုတ်ဆုတ်ပြီး နယ်ပေးပါ
- အရသာ နယ်ပြီးပါက ကြက်ဥအကာနှင့် ထောင်းထားတာတွေကိုထည့်ပြီး အရသာ သမအောင် နယ်ပေးကာ တစ်နာရီလောက် နှပ်ထားပေးပါ
- အရသာ နှပ်ပြီးသွားပါက ဂျုံမှုန့်နဲ့ ကြက်တောင်ပံ တစ်ခုလုံး အပေါ်ကို ဖြူ းပြီး ခပ်ဖွဖွ လူးပေးပါ
- အောက်ချေ မကပ်သော ဒယ်အိုးတစ်လုံးထဲမှာ ဆီကိုခပ်များများထည့်ပြီး အပူပေးပါ
- ဆီပူလာပါက မီးကိုအနေတော်မှာ ထားပေးပြီး ကြက်ဆေတာင်ပံများကို အိုးဆန့်သလောက် ထည့်ကြော်ပေးပါ
- ကြက်တောင်ပံ တစ်ဖက်ရွှေဝါရောင် သန်းလာရင် နောက်တစ်ဖက် လှန်ပေးပြီး နောက်တစ်ဖက် ရွှေဝါရောင် သန်းလာပါက ဆယ်ပြီး ဆီစစ်ပေးပါ
- ဆီစစ်သွားပါက ကြက်သားကြော် ကြွတ်ကြွတ်မွှေးမွှေးလေးကို မိမိနှစ်သက်သလို စားသုံရန် ပြင်ပေးနိုင်ပါပြီ။
No comments:
Post a Comment