မာမာဒီနေ့တော့ အမဲအူ ကြမ်းလေးတွေ ဝယ်လာပြီး မြန်မာပါးစပ်နဲ့ အကြိုက်တွေ့စေမဲ့ ပဲမှုန့်နံ့ သင်းသင်းလေးနဲ့ ချဥ်ချဥ် ငံငံ စပ်စပ်လေး သုပ်ဖြစ်ပါတယ်။
ဒါကြောင့်မို့လို့ အရမ်းစပ်ပြီး စားလို့အရမ်းကောင်းတဲ့အတွက် မာမာပြင်ဆင်ပြီး သုပ်ထားတဲ့ အမဲအူကြမ်း အသုပ်သုပ်နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- အမဲအူကြမ်း ပြုပ်ပြီးသား - ဟင်းပြင်ပန်းကန် တစ်လုံးစာ
- သံပုရာရည် - ထမင်းစားဇွန်း တစ်ဇွန်းခွဲ
- ပဲအကျက်မှုန့် - ထမင်းစားဇွန်း တစ်ဇွန်းခွဲ
- ငါးငံပြာရည် - လက်ဖက်ရည်ဇွန်း တစ်ဇွန်းသာသာ
- အရသာမှုန့် - လက်ဖက်ရည်ဇွန်း တစ်ဝက်
- ငရုတ်သီး အလှော်မှုန့် - မိမိနှစ်သက်သလောက်
- သခွါးသီး - မိမိနှစ်သက်သလောက်
- နံနံပင် - မိိမိနှစ်သက်သလောက်
- ငရုတ်သီးစိမ်း - စားနိူင်သလောက်
- ကြက်သွန်နီ - အနေတော် တစ်လုံး
- ကြက်သွန်နီ ဆီချက်ဖတ် - ထမင်းစားဇွန်း နှစ်ဇွန်း
အသုပ်သုပ်ရန် ပြင်ဆင်ပုံ
- အမဲအူကြမ်း ပြုပ်ပြီးသားကို မထူမပါးလေးတွေ လှီးပေးပြီး အဆင်သင့် ပြင်ထားပါ
- ကြက်သွန်နီကို အခွံခွာပြီး ရေဆေးကာ ခပ်ပါးပါး လှီးထားပါ
- နံနံပင်ကို ရေဆေးပြီး မထူမပါး လှီးထားပါ
- သခွါးသီးကို ရေဆေးပြီး ခပ်ပါးပါး လှီးထားပါ
- ငရုတ်သီးစိမ်းကို ရေဆေးပြီး မထူမပါးလေးတွေ လှီးထားပါ
- သံပုရာသီးကို ရေဆေးပြီး အဆင်သင့် ပြင်ထားပါ
- ပါဝင်ပစ္စည်းများကို အဆင်သင့် ပြင်ထားပါ။
အသုပ်သုပ်ပုံ
- ဇလုံတစ်လုံးထဲမှာ အမဲအူကြမ်း ပဲအကျက်မှုန့် ကြက်သွန်နီ ငရုတ်သီး အလှော်မှုန့် ငရုတ်သီးစိမ်း နံနံပင်နှင့် သခွါးသီး တို့ကို ထည့်ပေးပါ
- ပြီးတာနဲ့ ငါးငံပြာရည်နှင့် အရသာမှုန့်တို့ထည့်ကာ သံပုရာရည်ညှစ်ပြီး နယ်ပေးပါ
- အရသာ သမအောင် နယ်ပြီးတာနဲ့ အရသာ မြည်းပေးကာ မိမိနှစ်သက်တဲ့ အရသာ ရလာအောင် ပြင်ပေးပါ
- အရသာ သမသွားတာနဲ့ အရမ်းစပ်ကာ စားလို့ကောင်းပြီး ပဲအကျက်မှုန့်နံ့ သင်းသင်းလေးနဲ့ အမဲအူကြမ်းသုပ်ကို စားသုံးရန် ပြင်ပေးနိူင်ပါပြီ။
