အရမ်းစပ်ပြီး မွှေးလွန်းတဲ့ ငရုတ်သီးစိမ်းလေးတွေ $20 ဖိုးဝယ်လာတာ တစ်ခါထဲလဲ စားမကုန်လေတော့ အိမ်ရောက်ပြီး ၂ရက်လောက်နေတာနဲ့ အနီရောင်တွေ ဖြစ်လာခဲ့တယ်။
အဲဒါနဲ့ဘဲ တာရှည်ခံပြီး လိုတဲ့အခါ သုံးနိူင်လေအောင် ဗလင်ဒါထဲထည့်ပြီးကြိတ်ကာ သိမ်းဖို့ပြင်ဆင်ရပြန်ပါတယ်။
အရမ်းဘဲ စပ်လွန်းတဲ့ အသီးလေးတွေမို့လို့ အစပ်စားပြီး အစပ်အရမ်းကြိုက်တဲ့ မာမာ့အတွက်တော့ အရမ်းကို အဖိုးတန်လွန်းပါတယ်။
ဒါကြောင့်မို့လို့ လိုချင်တဲ့ အချိန်မှာ အလွယ်တကူရပြီး အဆင်ပြေနိူင်အောင် ငရုတ်သီးစိမ်းလေးတွေကို ဗလင်ဒါနဲ့ ကြိတ်ပြီး သိမ်းပါမယ် ရခိုင်မုန့်တီနဲ့ စားမလား ငါးပိရည်ဖျော်မလား ဟင်းချက်မလား ဘယ်နေရာမှာဘဲသုံးသုံး အသုံးဝင်ပါတယ်ရှင်။
ပါဝင်ပစ္စည်းများ
- အရမ်းစပ်သော ငရုတ်သီးစိမ်း - တစ်ကီလို
- ဆား - ထမင်းစားဇွန်း တစ်ဝက်
ပြင်ဆင်ပုံ
- ငရုတ်သီးစိမ်းများကို အရင်ဆုံး ရေဆေးထားပါ
- ပြီးတော့မှ ပုံပါအတိုင်း တစ်တောင့်ခြင်း အညှာခြွေပေးပါ
- အားလုံးအဆင်သင့် ဖြစ်တာနဲ့ ကြိတ်စက်အဆင်ပြေပါက ကြိတ်စက်နှင့် ကြိတ်ပေးပါ
- ကြိတ်စက် အဆင်မပြေပါက ငရုတ်ဆုံနှင့် ထောင်းပေးပါ
- ငရုတ်ဆုံနှင့်ထောင်းပါက လက်ပူတဲ့အတွက် လက်အိတ်စွတ်ပြီးမှ ထောင်းပေးပါ
- ဗလင်ဒါနှင့် ကြိတ်မည်ဆိုပါက ဗလင်ဒါထဲထည့်ပြီး မိမိနှစ်သက်တဲ့ အနေအထားရအောင် ကြိတ်ပေးပါ
- ငရုတ်ဆုံနှင့် ထောင်းလျှင်လည်း အားလုံးကိုရောကာ မိမိနှစ်သက်တဲ့ အနေအထားရအောင် ထောင်းပေးပါ
- လိုချင်သည့် အနေအထားရပါက အားလုံးအဆင်သင့် ဖြစ်တာနဲ့ တခါချက်စာ အထုတ်လေးတွေကို လေလုံသော အိတ်လေးများထဲ ထည့်ပေးပါ
- ဟင်းချက်ရန်နှင့် ငါးပိရည်ဖျော်ရန်တွင် သုံးရန်အတွက် လေလုံအိတ်ထဲ ထည့်ထားသော အထုတ်များကို ရေခဲသေတ္တာ ခဲသောအကန့်ထဲမှာ ထည့်ခဲထားပါ
- မိမိအသုံးပြုမည်ဆိုပါက ထိုအထုတ်လေးကို ၂နာရီလောက် ကြိုထုတ်ထားပေးပါ
- ခဲနေတာတွေ ပျော်လာပါမှ ဟင်းချက်ရန်နှင့် မိမိလိုရာတွင် သုံးရန်အတွက် စပ်ပြီးမွှေးနေတဲ့ ငရုတ်သီးစိမ်း ကြိတ်ပြီးသားလေးကို အဆင်သင့် ရပါပြီ။
