မာမာ ဒီနေ့တော့ အရင်ရက်က ပဲတီချဥ်လေး ထည့်ထားတာ ချဥ်လာပြီ ဖြစ်တဲ့အတွက် မျှစ်ပြုပ်ပြီးသားလေးတွေ ဝယ်လာပြီး ပဲတီချဥ် သနပ်လေး လုပ်ဖြစ်ပါတယ်။
ပဲတီချဥ်ကြီးဘဲ ချဥ်ငံစပ်လေး လုပ်လို့ရပေမဲ့ မျှစ်ပြုပ်လေးပါတော့ ပိုပြီးစားလို့ကောင်းတဲ့အတွက် မျှစ်လေးထည့်ထားပါတယ်။
မာမာက အသားငါးထက် အသီးအရွက်ကို ပိုပြီးကြိုက်တဲ့အတွက် ဟင်းသီးဟင်းရွက် အသီးအနှံကို အမျိုးမျိုး လုပ်စားလေ့ ရှိပါတယ်။
ဒါကြောင့်မို့လို့ ဒီနေ့တော့ မာမာပြင်ဆင်ပြီး ပြုလုပ်ထားပြီး စားလို့ကောင်းလွန်းတဲ့ ပဲတီချဥ် သနပ် ပြုလုပ်နည်းလေးကို မျှဝေပေးလိုက်ပါတယ်ရှင်။
ပါဝင်ပစ္စည်းများ
- ပဲတီချဥ် - 3oo g
- မျှစ်ပြုပ်ပြီးသား - 200 g
- ငရုတ်သီး အရောင်တင်မှုန့် - ထမင်းစားဇွန်း လေးဇွန်း
- ပဲနံ့သာစေ့ - လက်ဖက်ရည်ဇွန်း တစ်ဇွန်း
- မုန်ညင်းစေ့ - လက်ဖက်ရည်ဇွန်း တစ်ဇွန်း
- ပျဉ်းတော်သိမ်းရွက် - တစ်ခက်
- ကြက်သွန်ဖြူ - အမွှာကြီးကြီး ဆယ်မွှာ
- ငရုတ်သီးစိမ်း - ဆယ်တောင့်
- ဆား - လက်ဖက်ရည်ဇွန်း ဇွန်းတဝက်
- အရသာမှုန့် - လက်ဖက်ရည်ဇွန်း တစ်ဝက်သာသာ
- ဆီ - လိုသလောက် သုံးပေးပါ
ပြင်ဆင်ပြုလုပ်ပုံ
- ပဲတီချဥ်ကို အရည်များ ညှစ်ထားပါ
- မျှစ်ပြုပ်ပြီးသားကို ရေဆေးပြီး ရေစစ်ထားပါ
- ပဲနံသာစေ့နှင့် မုန်ညင်းစေ့ကိုလှော်ပြီး ကြိတ်ထားပါ
- ပျဉ်းတော်သိမ်းရွက်ကို ရေဆေးပြီး ရေစစ်ကာ အရွက်ခြွေထားပါ
- ငရုတ်သီးစိမ်းကို ရေဆေးပြီး အညှာခြွေကာ ရေစစ်ထားပါ
- ကြက်သွန်ဖြူကို အခွံခွါပြီး ရေဆေးကာ ရေစစ်ထားပါ
- အားလုံးအသင့် ဖြစ်ပါက အိုးထဲတွင် ဆီထည့်ပြီး အပူပေးပါ
- ဆီပူလာပါက မီးအနည်းငယ်လျှော့ပြီး အရောင်တင်မှုန့် ပျဉ်းတော်သိမ်းရွက်နှင့် ပဲနံသာစေ့ မုန်ညင်းစေ့အမှုန့်တို့ကို ထည့်ပေးပြီး ဆီသပ်ပေးပါ
- ဆီသပ်နံ့ မွေးလာပါက ပဲတီချဥ်နှင့် မျှစ်တို့ကို ထည့်ပေးပြီးတာနဲ့ အရသာမှုန့်နှင့် ဆားထည့်ပြီး သမအောင် မွှေပေးကာ မျှစ်နှင့် ပဲတီချဥ်များထဲမှ ရေခမ်းပြီး ဆီပြန်အောင် ချက်ပေးပါ
- ပြီးတော့မှ ကြက်သွန်ဖြူနှင့် ငရုတ်သီးစိမ်းကို ထည့်မွှေပေးကာ အရသာ မြည်းပေးပြီး မိမိစိတ်ကြိုက် အရသာ ရလာအောင် ပြင်ပေးပါ
- ဆီပြန်လာပါက မီးပိတ်ပေးပြီး မီးဖိုပေါ်မှ ဖယ်ပေးကာ အအေးခံထားပါ
- လုံးဝအေးသွားလျှင် သန့်ရှင်းခြောက်သွေ့သော ပုလင်းထဲမှာ ထည့်ပေးကာ အဖုံးလုံအောင် ပိတ်ပေးကာ ရေခဲသေတ္တာထဲတွင် သိမ်းဆည်းထားပါ
- မိမိ စားသုံးလိုပါက ဇွန်းသန့်သန့်ဖြင့် ခပ်ယူကာ စားသုံးပါက သုံးလခန့် သိမ်းဆည်းထားနိုင်ပါတယ်
- ပဲတီချဥ် သနပ်လေးကို ထမင်းဖြူနှင့် တွဲဖက်ကာ မိမိနှစ်သက်သလို စားသုံးနိူင်ပါပြီ။
