မာမာဒီနေ့တော့ Banana Prawn လေးတွေ ဝယ်လာဖြစ်လို့ ပုဇွန်အချိုကြော်လေး ကြော်ပါတယ် ရေငံပုဇွန်တို့ရဲ့ ထုံးစံအတိုင်း ပုဇွန်အနံ့က ရေချိုပုဇွန်တို့ထက် အနံ့နဲနဲ ပိုပြင်းပါတယ်။
အဲဒီအနံ့ကို ပျောက်အောင်လို့ ပုဇွန်ထုတ်ကို သံပုရာရည်နဲ့ အရင်ဆုံး နယ်ပြီးဆေးရသလို ကြော်တဲ့အခါမှာလဲ ငါးငံပြာရည်နဲ့ ကြက်သွန်ဖြူ ပါလေမှ ပုဇွန်ရဲ့ အညှီနံ့ ကင်းပါတယ်။
မကြော်ခင်မှာ ပုဇွန်ကို အခွံခွာ ပြီးတာနဲ့ သံပုရာရည်နဲ့ အရင်ဆုံး နယ်ပေးပြီးမှ ကြောခွဲပြီး အမဲကြောင်းထုတ်ကာ သန့်ရှင်းအောင် အရင်ဆုံး လုပ်ပေးရပါတယ်။
ပြီးမှ ကင်းမွန်ငံပြာရည်ကို အဓိထားပြီးထဲ့ကာ အရသာတွေနဲ့နယ်ပြီး ဆယ်မိနစ်လောက် နှပ်ထားပြီးမှ ကြော်ပေးတာ အကောင်းဆုံးပါ အဲဒါမှ ရေငံပုဇွန်ရဲ့ အနံ့ပျောက်နိုင်ပါတယ်။
ဒါကြောင့်မို့လို့ မာမာပြင်ဆင်ပြီး ကြော်ထားတဲ့ ပုဇွန်ကျား ပုဇွန်ထုတ် ကြော်တဲ့ ကြော်နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ပုဇွန်ထုတ် - အကောင်ကြီးကြီး ဆယ်ကောင်
- ကင်းမွန်ငံပြာရည် - ထမင်းစားဇွန်း တစ်ဇွန်းခွဲ
- သံပုရာရည် - ထမင်းစားဇွန်း သုံးဇွန်း (ပုဇွန်အညှီဓါတ်ပျောက်အောင်ဆေးရန်)
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- အရသာမှုန့် - လက်ဖက်ရည်ဇွန်း တစ်၀က်သာသာ
- ကြက်သွန်နီ - အလုံးကြီးကြီး တစ်လုံး
- ကြက်သွန်ဖြူ - အမွှာကြီးကြီး သုံးမွှာ
- ဆီ - ထမင်းစားဇွန်း ဆယ်ဇွန်း
ပြင်ဆင်ချက်ပြုပ်ပုံ
- ပုဇွန်ကို ရေဆေးပြီး မလိုသော အရာများဖယ်ပြီး သန့်စင်ထားပေးပါ
- ပြီးတာနဲ့ သံပုရာရည်နှင့် နယ်ပေးကာ ငါးမိနစ်လောက် နှပ်ထားပြီးမှ ရေဆေးပေးပါ
- သန့်စင်ထားသော ပုဇွန်ကို နနွင်း အရသာမှုန့် ငါးငံပြာရည်တို့နဲ့နယ်ပြီး အရသာ၀င်အောင် ငါးမိနစ်လောက် နှပ်ထားပေးပါ
- ကြက်သွန်နီကို အခွံခွာပြီး အလုံးလိုက် ရေဆေးကာ ခပ်ပါးပါး လှီးထားပါ
- ကြက်သွန်ဖြူကို အခွံခွာပြီး ရေဆေးကာ ဓါးပြားရိုက်ထားပါ
- လိုအပ်တာတွေ ပြင်ပြီးပါက ဒယ်အိုးထဲ ဆီနှင့်နနွင်းမှုန့်တို့ထည့်ကာ ဆီကိုအပူပေးပါ
- ဆီပူလာပါက ကြက်သွန်နီနှင့် ကြက်သွန်ဖြူကို အနည်းငယ် ပျော့လာတဲ့အထိ ကြော်ပေးပါ
- ကြက်သွန်များ ပျော့သွားတာနဲ့ ပုဇွန်အရသာနယ်ကို ၄မိနစ်လောက် ထည့်ကြော်ပေးပါ
- ပုဇွန်ထုတ်က အကောင်ကြီးတဲ့အတွက် အသားထဲအထိ ကျက်စေရန် ရေအနည်းငယ်ထည့်ကာ အဖုံးအုပ်ပြီး တည်ပေးပါ
- ပုဇွန်အချိုကြော် ကျက်ပြီ ဆိုတာနဲ့ အရသာမြည်းပြီး လိုသလိုပြင်ပေးကာ မီးပိတ်ပေးပြီး စားသုံးရန် ပြင်ဆင်နိုင်ပါပြီ။
