မာမာ ဒီနေ့တော့ ဂေါ်ရခါးညွန့်လေးတွေကို ထမင်းစားလို့ မြိန်စေမဲ့ အရည်သောက်ဆမ်း ချဥ်ရည်ဟင်းလေး ချက်ပါမယ် လွယ်ကူတဲ့ ချက်နည်းလေးဖြစ်သလို ထမင်းစားလို့ မြိန်စေတဲ့ ဟင်းတစ်မျိုးဖြစ်လို့ မာမာပြင်ဆင်ပြီး ချက်ထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- ဂေါ်ရခါးညွန့် - လက်တစ်ဆုတ်စာ တစ်စည်း
- ကြက်သွန်ဖြူ - အမွှာကြီးကြီး ၂မွှာ
- ကြက်သွန်နီ - အနေတော် တစ်လုံး
- ချင်း - ခပ်ပါးပါး ၃ပြားလောက်
- နနွင်းမှုန့် - လက်ဖက်ရည်ဇွန်း သုံးပုံတစ်ပုံ
- ငါးငံပြာရည် - ထမင်းစားဇွန်း ၂ဇွန်း
- အချိုမှုန့် - လက်ဖက်ရည်ဇွန်း တစ်၀က်သာသာ
- ခရမ်းချဉ်သီး - အနေတော် လေးလုံး
- မကျည်းသီးမှည့် - ထမင်းစားဇွန်း တစ်ဇွန်း
- ငရုတ်သီး အရောင်တင်မှုန့် - လက်ဖက်ရည်ဇွန်း တစ်ဇွန်း
- မျှင်ငါးပိ - အနည်းငယ်
ပြင်ဆင်ပုံ
- ဂေါ်ရခါးညွန့်ကို အကြောများသင်ပြီး အနေတော် ပိုင်းဖြတ်ကာ ရေငါးထပ်လောက် ဆေးပေးပါ
- ကြက်သွန်ဖြူ ကြက်သွန်နီ ချင်း ငရုတ်သီးမှုန့်တို့ကို ညက်နေအောင် ရောထောင်းပေးထားပါ
- ခရမ်းချဉ်သီးကို ရေဆေးပြီး ခပ်ပါးပါးလေးတွေ လှီးထားပါ
- မန်ကျည်းသီးမှည့်ကို ရေဆေးပြီး ရေနွေးပူပူနဲ့ စိမ်ထားပါ
- အရည် သောက်ဆမ်းဟင်း အနေအထား ချက်မှာ ဖြစ်တဲ့အတွက် အရင်ဆုံး အိုးထဲမှာ ရေကို ယောက်ချိုဇွန်း လေးဇွန်းလောက် ထည့်ပေးပါ
- ထိုရေထဲမှာ မန်ကျည်းမှည့်ရည် ပုဇွန်ငါးပိ ကြက်သွန်ထောင်း ခရမ်းချဉ်သီးတို့ ထည့်ကာ ရေပွက်ပွက်ဆူအောင် တည်ပေးပါ
- ရေပွက်ပွက် ဆူလာတာနဲ့ ဂေါ်ရခါးညွန့် ကိုထည့်ကာ အိုးအဖုံး မအုပ်ဘဲ တည်ပေးပါ
- ဂေါ်ရခါးညွန့်လေးတွေကို ခပ်စိမ်းစိမ်း အရောင်လေး ရချင်တဲ့အတွက် အဖုံးမအုပ်ဘဲ တည်ပေးပါ
- ရေပွက်ပွက် ဆူလာတာနဲ့ အကြာကြီး တည်စရာ မလိုဘဲ ရှစ်မိနစ်လောက် တည်ပေးပြီးတာနဲ့ အရသာမြည်းပြီး မိမိစိတ်ကြိုက် လိုသလို ပြင်ပေးပါ
- အရည်သောက်ဆမ်းဟင်း ဖြစ်တဲ့အတွက် ဟင်းရည်အနေအထားကိုလဲ မိမိစိတ်ကြိုက် အနေအထားလောက် ရလာအောင်လဲ ပြင်ပေးနိူင်ပါတယ်
- အရသာ ပြင်ပြီးတာနဲ့ မီးပိတ်ကာ ဂေါ်ရခါးညွန့် အရည်သောက်ဆမ်းဟင်းကို စားသုံးရန် ပြင်ပေးနိူင်ပါပြီ။
