အခုနောက်ပိုင်း မစားရတာ ကြာနေပြီး စိတ်ထဲက စားချင်စိတ်လေး ပေါ်လာတာနဲ့ အညာက မိတ်ဆွေတယောက်ကိုမေးပြီး လုပ်ထားပါတယ်။
ထန်းလျှက်အပျော့ မရှိပါက သကြားကို သုံးလို့ရသလို အုန်းသီးအစို မရပါက အုန်းသီးခြစ်ပြီးသား အခြောက်ကိုလဲ သုံးလို့ရပါတယ်။
တစ်ချို့ကတော့ ထောပါတ်ထည့်ပြီး လုပ်ကြပါတယ် မာမာကတော့ ထောပါတ် မထည့်ထားပါဘူး အချိုအရသာကိုလဲ အချိုကြိုက်ပါက ပိုထည့်ပေးနိူင်ပါတယ် မာမာက အချိုမကြိုက်တဲ့အတွက် အချိုလျှော့ထည့်ထားပါတယ်။
ပါဝင်ပစ္စည်းများ
- ကောက်ညှင်းမှုန့် - ထမင်းပေါင်းအိုး ဆန်ချင်ဗူး သုံးဗူး
- အုန်းသီးခြစ်ပြီးသား - ထမင်းပေါင်းအိုး ဆန်ချင်ဗူး သုံးဗူး
- ထန်းလျှက်အပျော့ - ထမင်းပေါင်းအိုး ဆန်ချင်ဗူး တစ်ဝက်သာသာ (အချိုကြိုက်ပါက ပိုထည့်ပါ)
- ဆား - လက်ဖက်ရည်ဇွန်း ငါးပုံတစ်ပုံ
- ရေ - ထမင်းပေါင်းအိုး ဆန်ချင်ဗူး သုံးဗူး (ထန်းလျှက်ရည်ကျိုရန်)
- ရေနွေးကို လိုအပ်ရင် သုံးဖို့အတွက် သတ်သတ်တည်ထားပေးပါ
ပြင်ဆင်ပုံ
- အရင်ဆုံး ဒယ်အိုးထဲမှာ ကောက်ညှင်းမှုန့်များကိုထည့်ပြီး မီးနွေးနွေးနဲ့ လှော်ပေးပါ
- ကောက်ညှင်းမှုန့်များ အကျက်ညီစေရန် လှော်နေစဥ် အဆက်မပြတ် မွှေမွှေပေးပါ
- ကောက်ညှင်းလှော်နံ့လေး သင်းလာတာနဲ့ မီးပိတ်ပြီး ပန်းကန်တစ်ခုထဲ ပြောင်းထည့်ပေးပါ
- လှော်ပြီးသား ကောက်ညှင်းမှုန့်ကို ဆန်ချင်ဗူး တစ်ဝက်သာသာလောက်ကို အုန်းယိုနှင့် လူးပေးရန် ဖယ်ထားပါ
- ရေနွေးကို ဆူအောင်တည်ပေးပြီး အဆင်သင့် ပြင်ထားပါ
- အိုးတစ်လုံးထဲမှာ ရေ ဆားနှင့် ထန်းလျှက်တို့ကိုထည့်ပြီး ပွက်ပွက်ဆူအောင် တည်ပေးပါ
- ထန်းလျှက်များ ပျော်လာတာနဲ့ ခြစ်ပြီးသား အုန်းသီးနှင့် ကောက်ညှင်းလှော်မှုန့်တို့ကိုထည့်ပြီး မွှေပေးပါ
- မွှေနေစဥ် အုန်းယိုများ ခဲပျစ်လာပါက ရေနွေးကို နည်းနည်းချင်း ထည့်မွှေပေးပါ
- ကောက်ညှင်းသား အဖြူရောင် အရောင်ပျောက်လာပြီး အုန်းယိုခပ်ပျစ်ပျစ်လေး ရလာရင် ရပါပြီ။
ပြုလုပ်ပုံ
- စောစောက ချန်ထားသော ကောက်ညှင်းလှော်မှုန့်ကို ပန်းကန်တစ်ခုထဲမှာ ထည့်ထားပေးပါ
- ယိုထိုးထားသော အုန်းယိုကို ခပ်နွေးနွး အနေအထားမှာ အနေတော်လေးတွေ ယူပေးကာ ဆုတ်ဆုတ်ပေးပြီး ခပ်ပျံ့ပျံ့လေး လုပ်ပေးပါ
- ပြီးတာနဲ့ ကောက်ညှင်းမှုန့်ထဲမှာ လူးပေးပါ
- ထိုနည်းအတိုင်း အုန်းယိုများ ကုန်တဲ့အထိ လုပ်ပေးပြီးတာနဲ့ စားချင့်စဖွယ် ကရေကရာ မုန့်လေးကို ရပါပြီ။
မှတ်ချက် ။ ။ အုန်းယိုထိုးတဲ့အခါ မိမိတို့ အသုံးပြုတဲ့ ကောက်ညှင်းမှုန့် အပျော့ အမာပေါ် မူတည်ပြီး ရေကိုတစ်ခါထဲ အများကြီး မထည့်ဘဲ နည်းနည်းချင်းထည့်ပေးကာ လိုတိုး ပိုလျှော့ လုပ်ပေးပါ။
No comments:
Post a Comment