ဒီနေ့တော့ ပဲတောင့်ရှည်လေးတွေရယ် သင်္ဘောသီး အစိမ်းလေးရယ် ဝယ်လာပြီး ချဉ်ငံစပ်လေး ထောင်းဖြစ်ပါတယ် ထောင်းတဲ့အထဲမှာ ဘာအသားမှ မပါပေမဲ့ ချိုချဉ်ငံစပ် အရသာ အစုံပါတဲ့အတွက် ရေနွေးကြမ်းလေးနဲ့ လိုက်ဖက်လွန်းတဲ့အတွက် မာမာပြင်ဆင်ပြီး ထောင်းထားတဲ့ နည်းလေးကို မျှဝေပေးလိုက်ပါတယ်ရှင်။
ပါ၀င်ပစ္စည်းများ
- သင်္ဘောသီးစိမ်း ခြစ်ပြီးသား - လက်တစ်ဆုတ်စာ
- ပဲတောင့်ရှည် - ငါးတောင့်
- ငရုတ်သီး အခြောက်တောင့် - ငါးတောင့်
- ဆလတ်ရွက် - နှစ်သက်သလောက်
- အရသာမှုန့် - လက်ဖက်ဇွန်း တစ်ဝက်သာသာ
- ကြက်သွန်ဖြူ- အမွှာကြီးကြီး လေးမွှာ
- ငါးငံပြာရည်အနောက် -ထမင်းစားဇွန်း တစ်ဇွန်း
- ငါးငံပြာရည်အကြည် - ထမင်းစားဇွန်း တစ်ဇွန်း
- ဂဏန်းငံပြာရည် - ထမင်းစားဇွန်း တစ်ဇွန်း
- အရသာမှုန့် - လက်ဖက်ရည်ဇွန်း တစ်ဇွန်း
- သံပုရာသီး - တစ်ခြမ်း (အချဉ်ကြိုက်ပါက ပိုထည့်ပါ )
ပြင်ဆင်ပုံ
- သင်္ဘောသီး တစ်စိတ်ကို အခွံခွာပြီး မလိုတာတွေ ဖယ်ထုတ်ပေးပြီး ရေဆေးကာ ခြစ်ထားပါ
- ပဲတောင့်ရှည်များကို ရေဆေးပြီး အနေတော်လေးတွေ လှီးထားပါ
- ငရုတ်သီးတောင့်ကို အညှာခြွေပြီး ရေဆေးထားပါ
- ပဲတောင့်ရှည် ငါးတောင့်ခန့်ကို ရေဆေးပြီး အနေတော် ပိုင်းဖြတ်ထားပါ
- ကျန်ပဲတောင့်ရှည်များကို ရေဆေးပြီး ခပ်ရှည်ရှည်လေးတွေ ပိုင်းထားပါ
- ကြက်သွန်ဖြူ ကို အခွံခွာပြီး ရေဆေးထားပါ
- သံပုရာသီးကို ရေဆေးပြီး ထက်ခြမ်း ခြမ်းပေးထားပါ
- ပါ၀င်ပစ္စည်းများကို ပြင်ထားပါ
ထောင်းရန်ပြင်ဆင်ပုံ
- ငရုတ်ဆုံ ခပ်ကြီးကြီးထဲမှာ ကြက်သွန်ဖြူ နှင့် ငရုတ်သီး အခြောက်တောင့်တို့ကိုထည့်ပြီး မညက်တစ်ညက် ထည့်ထောင်းပါ
- အနည်းငယ် ညက်သွားတာနဲ့ ငံပြာရည် သုံးမျိုးလုံးနှင့် အရသာမှုန့်တို့ကို ထည့်မွှေပေးပါ
- ထောင်းနေစဉ် အရသာ သမသွားအောင် ဇွန်းအရိုးရှည်ရှည်နှင့် မွှေမွှေပေးပါ
- မိမိအသုံးပြုပြီး ထောင်းသော ကျည်ပွေ့ပေါ် မူတည်ပြီး ကြည့်ထောင်းပါ
- ကျောက်ကျည်ပွေ့ဆိုပါက ၅ချက်မှ ၁၀ချက်လောက် ခပ်ဖွဖွလေး ထောင်းပေးပါ
- သစ်သားကျည်ပွေ့ဆိုပါက အချက် ၁၅ချက် လောက် ခပ်ဖွဖွလေး ထောင်းပေးမှ အရသာ ၀င်ပါတယ်
- အရသာ သမလောက်ပြီ ဆိုတာနဲ့ အရသာမှုန့် သံပုရာရည်တို့ကို ထည့်ပြီး ခပ်ဖွဖွလေး ၄ချက်လောက် ထောင်းပေးကာ ပဲသီးနှင့် သင်္ဘောသီး တို့ကို ထည့်ပေးပြီး လေးငါးချက်လောက် ထည့်ထောင်းပြီး မွှေပေးပါ
- ထောင်းနေစဉ် အရသာ မြည်းပေးပြီး မိမိနှစ်သက်တဲ့ အရသာ ရတဲ့အထိ ပြင်ပေးပါ
- ပြီးတာနဲ့ သင်္ဘောသီး ပဲသီးထောင်း ချိုချဉ်ငံစပ်လေးကို မိမိနှစ်သက်သလို ကောက်ညှင်းပေါင်း ဆလတ်ရွက်တို့နှင့် တွဲဖက်ကာ သုံးဆောင်နိူင်ပါပြီ။
No comments:
Post a Comment